NOTISIA NAN DI POLIS BONEIRU.

 

Aksidente

Riba djárason 13 di mei pa mas o ménos 5.15 or di atardi, sentral di polis a risibí notifikashon di un insidente di un hòmber ku un palèt.  Nan tabata bahando palètnan ku klenku. E klenkunan ku tabata riba un palèt ku tabata riba waf kaba e kuminsá move i a kai riba e hòmber. E víktima a keda heridá levemente ku un herida ku mester a wòrdu kosé i personal di ambulans a trat’é na e sitio mes.

 

Ladronisianan

Riba djabièrnè 15 di mei a drenta keho di ladronisia di un baiskel koló kòrá di marka Mountainbike. Riba e bara di e baiskel tin e teksto ‘Happy Ride’, e tayer di patras i di dilanti no ta meskos; e tayer patras ta di rust i e rim di e tayer di dilanti ta koló blou skur. E plèstik entre e trapnan i e kadena tin un krak ku ta wantá ku un pida waya di heru. E baiskel tabata stashoná na Chachacha Beach, no tabata na lòk i a bai kuné riba djaweps 14 di mei entre 6.50 or i 7.10 or di anochi.

 

Riba djasabra 16 di mei, pa mas o ménos 6.45 or di anochi a drenta keho di ladronisia di dos botr’í gas for di un restorant situá na Kaya Islariba.

 

Riba djasabra 16 di mei alrededor di 7 or di anochi a drenta keho di ladronisia for di un outo. A bai ku entre otro un iPhone koló ros i un kámara digital di marka Minolta. E artíkulonan tabata den un tas koló bèrdè skur. E outo tabata stashoná na e sitio di buseo ‘Tori’s Reef’ situá na Bulevar E.E.G.

 

Riba djadumingu 17 di mei pa mas o ménos 1or di atardi a drenta keho di ladronisia di un baiskel koló bèrdè di marka Gazelle. E baiskel tin 7 spit i un makutu koló pretu. E ladronisia a tuma lugá entre djasabra 16 di mei, mas o ménos 5 or di atardi i djadumingu 17 di mei, pa mas o ménos 11.45 or di mainta. E baiskel tabata mará na un palu riba tereno di un kompleho di apartamento situá na Bulevar Julio A. abraham.

 

E kasonan ta bou di investigashon.

 

 

 

 

Aksidentenan

Riba djaweps 14 di mei pa mas o ménos 1 or di atardi un aksidente a tuma lugá riba Kaya Korona. Motibu di e aksidente no ta konosí ainda. Shofùr di e outo sufrí heridanan na su frenta i personal di ambulans a trat’é na e sitio mes.

 

Riba djaweps 14 mei pa mas o ménos 7.15 or di anochi sentral di polis a risibí notifikashon di un aksidente riba Kaya Thomas M. Marchena. Un pikòp ku tabata biniendo for di direkshon di Kaya Lisboa a kita bai na su man robes riba e krusada T. Hasiendo esaki ela baha for di kaminda i a bai dal den un outo stashoná kara pa direkshon suit. Seguidamente e pikòp a pèrdè kòntròl kita bai na man robes pa despues mesora kita bai na man drechi i a bai dal den muraya di un kas. E winshil patras di un outo ku tabata stashoná patras di e outo stashoná a kibra. Shofùr di e pikòp a keda heridá levemente i e no mester a bai ku ambulans. E pasahero di e pikòp si a keda transportá ku ambulans pa hòspital pa tratamentu médiko.

 

Riba djasabra 16 di mei, alrededor di 11 or di anochi un aksidente entre un pikòp i un skuter riba Kaya Nikiboko Suit. E shofùr i pasahero di skuter tabata koriendo den direkshon suit riba Kaya Nikiboko Suit ora ku direpente un pikòp a kore subi Kaya Nikiboko Suit  for di Kaya Hulanda. Ku konsekuensia ku e skuter a bai dal den e outo. Tur dos pasahero di skuter a kibra nan pia robes parti ariba a konsekuensia di e aksidente. A transportá ámbos víktima ku ambulans pa hòspital pa tratamentu médiko. Mas lat a transportá e víktimanan pa Colombia pa tratamentu médiko mas avansá.

 

Kiebro

Riba djasabra 16 di mei pa mas o ménos 7.45 or di mainta a drenta keho di kiebro den un kas situá na Kaya America. A bai ku entre otro un televishon di marka Philips, un lèptòp di marka Acer i un telefon di marka HTC. E kiebro a tuma lugá entre djabièrnè 15 di mei, pa mas o ménos 8.30 or di anochi i djasabra 16 di mei, pa mas o ménos 7.15 or di mainta. Ta investigando e kaso.

 

Kandela

Riba djasabra 16 di mei sentral di polis a risibí notifikashon di dos kandela chikitu ku a surgi, unu na Kaya dr. J.G. Hernandez i unu na un kunuku situá na Seru Grandi. Brantwer a paga ámbos kandela. No tabatin herido.

 

FUENTE :POLIS.

Share This
error: Content is protected !!