ULTIMO ORA: BONEIRU.
10 skuter i bròmer nobo tumá den beslag/ hañá.
Durante di e simannan tras di lomba Koninklijke Marechaussee (KMar) bou di guia di Ministerio Públiko na Boneiru a haña i konfiská dies skuter i bròmer nobo. E vehíkulonan aki a bini for di Hulanda i mayoria tabata prosedente di ladronisia. E balor total di e vehíkulonan aki ta vários míles di dòler. Esunnan ku a ser hañá ku e skuter i bròmernan aki òf di kua a ser establesé ku nan tabatin esakinan na nan disposishon, ta ser sospechá di entre otro inkubrimentu, labamentu di plaka i falsifikashon di dokumentu. Lo bai tin persiguishon penal tambe. Tabata usa e vehíkulonan aki pa entre otro karedanan riba kaya i ponementu di fever.
“Ta tristu mira kon e hóbennan ta kore pusta ku e skuter i bròmernan aki te ora nan kibra, miéntras e doñonan real pa añanan largu a traha duru pa yega na esaki, ‘ asina un miembro di e tim investigativo a trese dilanti.
Ministerio Públiko i e tim investigativo ta mustra riba e echo ku kada persona ku ta kumpra òf ta hasi uso di un skuter òf bròmer ta responsabel pa investigá ku esaki ta legal. Ta ampliamente konosí ku hopi skuter i bròmernan ta ser hòrtá i e investigashon di KMar atrobe ta prueba ku skuter i bròmernan hòrtá ta ser importá na Boneiru tambe. Pues sea kouteloso ku esaki. Esnan ku tòg ta skohe pa hasi esaki ta kore e riesgo ku nan por pèrdè su skuter òf bròmer i ser pèrsigui penalmente.
FUENTE: O.M./ LIVE FM.
NOTISIA KU BO POR KONFIA.
