MEDIDANAN DI PREKOUSHON PA BISHITA DI E BARKU DI TURISTA MS. RIVIERA

Kralendijk – Relashoná ku bishita e barku di turista Ms. Riviera djabièrnè 25 di mart, lo apliká medidanan di prekoushon pa loke ta trata pasaheronan ku lo baha for di e barku. Esaki ta debí na informashonnan ku a yega serka gezaghebber Edison Rijna, Salubridat Públiko i outoridatnan di haf ku supuestamente tin pasaheronan infektá ku un vírùs ku ta kousa sakamentu i diarea. Ta trata aki di norovirus i/òf Norwalk vírùs.
Pa e motibu aki ta tuma e siguiente medidanan ku ta permití solamente personanan ku no tin síntomanan di e infekshon pa desabordá e barku, miéntras ku personanan ku no ta malu pero tabata den estrecho kontakto ku pasaheronan ku ta poseé e vírùs tampoko lo wòrdu permití pa desembarká.
E pasaheronan ku desembarká, tin sigui sierto instrukshonnan manera desinfektá nan mes dor di mantené e higiena durante di tosamentu i higiena prinsipalmente di nan man.
Na momentu di desembarká, mester desinfektá prinsipalmente e mannan ku e medionan disponibel, manera djèl ku tin na disposishon di e pasahero na porta di e barku promé ku desembarká.
Den kaso ku un pasahero ku ta na bordo i mester di kuido médiko e tin ku akudí mesora na hospital pa asistensia médiko. Instansianan enbolbí ya a wòrdu pone na haltura i ta kla pa kualke eventual akshon ku mester tuma.
Banda di esaki ya na bordo di e barku a tuma medidanan pa apartá e pasaheronan ku ta infektá ku e vírùs pa evitá ku esaki ta eskalá.
Gezaghebber Edison Rijna a wòrdu informá ku e situashon ta bou di kontròl na bordo di e barku i ku e kantidat di pasaheronan ku ta malu a kuminsá baha konsiderablemente. Banda di esaki a tuma e pasonan nesesario pa desinfektá e barku di turista MS. Riviera na bordo mes.

IMG-20160325-WA0016

FUENTE: OLB

Share This
error: Content is protected !!