REKOMPENSA DI 10.000 DOLLAR PA YUDA SOLUSHONA KASO ASESINATO POLIS

Info OM:
Rekompensa na Boneiru pa solushoná kaso asesinato polis !

  • Aki ta sigui un update riba e kaso di atrako i tiroteo ku konsekuensia fatal pa un agente polisial ku a tuma lugá ayera nochi den bario di Sabadeco.
    Fiskal Mayó Henry Hambeukers i hefe interino di KPCN Jose Rosales ta informá komunidat ku e atrako ku a tuma lugá djárason anochi tabata unu hopi tristu. Djis pa duna un indikashon di kon serio e atrako aki tabata, por menshoná ku durante di e atrako un mucha a keda menasá ku arma di kandela, esaki ta algu hopi serio pasobra e ta kousa un trouma enorme pa e víktima en partikular pa un mucha.
    Banda di esei Fiskal Mayó i Hefe Interino di Kuerpo Polisial ta hasi un yamada urgente na komunidat pa ta alerta pa lo siguiente: tin indikashon ku un di e sospechosonan lo a keda uñá den su kara durante di e atrako. Kualke persona ku mira un hòmber ku uñá fresku den su kara, por fabor tuma kontakto ku polis mas pronto posibel na number di telefòn 717-8000 òf nos liña di tep anónimo ku ta 717-7251.Pa awor esaki ta úniko deskripshon ku por duna. Finalisando pa awor Fiskal Mayo i Hefe Interino di Kuerpo Polisial ta bolbe garantisá komunidat ku ta hasiendo tur esfuerso pa resolvé e kaso di atrako i tiroteo fatal aki mas pronto posibel pa asina komunidat por sinti su mes mas sigur, pero nos mester di yudansa di komunidat dor di yuda nos tep.
    Den e kaso serio aki Fiskal Mayó ta ofresé un rekompensa di $10.000
    Esun ku tin e tep ku ta kondusí na detenshon i/òf persekushon penal di un òf mas sospechoso den e kaso aki ta bini na remarke pa rekompensa. E suma di e rekompensa ta dependé di e kontribushon di e tep pa loke ta trata e investigashon aki.

IMG-20160818-WA0056

Share This
error: Content is protected !!