Polis mester di yudansa urgente di komunidat. Liña di tep anónimo i mas deskripshon di sospechosonan.

Polis i Ministerio Públiko BES ta pidi yudansa di komunidat di Boneiru atrobe den búskeda di e malechornan di e atrako armá i tiroteo ku a tuma lugá dia 17 di ougùstùs último.
Entretantu ta konosí ku un di e malechornan, probablemente dor di un kaida, a sufri un leshon grave i a pèrdè basta sanger. Ya den un komunikado anterior a pidi komunidat pa yuda ku informashon riba un hòmber ku uñá den su kara. Banda di esei e malechornan lo a sufri hinká di sumpiña. Si bo sa di un hende ku e tipo di leshonnan aki tuma kontakto ku polis. Tambe e malechornan a bai laga e siguiente artíkulonan personal atras: (Foto) un pèchi, (foto) un armbant i (foto) un oloshi.

Manera ya a keda anunsiá den e kaso serio aki fiskal mayó a pone un rekompensa di $10.000. Esun ku tin e tep ku ta kondusí na detenshon i/òf persekushon penal di un òf mas sospechoso den e kaso aki ta bini na remarke pa rekompensa. E suma di e rekompensa ta dependé di e kontribushon di e tep pa loke ta trata e investigashon
Pa e kaso di atrako i tiroteo ku konsekuensia fatal pa un agente polisial den e anochi di 17 di ougùstùs den e bario di Sabadeco KPCN a pone un liña di tep speshal na disposishon.
Personanan ku por ta den peliger serio òf pa otro motibu urgente por duna nan informashon solamente di forma anónimo, pa e kaso spesífiko aki por yama direktamente e servisio di inteligensia (Criminele Inlichtingen Dienst). E departamento di polis aki tei pa garantisá anonimidat di hendenan ku ta duna tep. Pa esaki por bèl e number 795-5746.

Bo sa mas di e kaso aki? Bo sa di un persona ku tin e tipo di leshonnan aki? òf bo ta rekonosé un òf mas di e artíkulonan di e fotonan? Tuma kontakto urgente ku polis via di e number di telefòn ariba menshoná. Tur otro informashon relashoná ku e insidente aki ta mas ku bon biní. Tambe por hasi uso di e liña di tep general di polis 717-7251.

IMG-20160820-WA0019 IMG-20160820-WA0018 IMG-20160820-WA0017 IMG-20160820-WA0016

NOTISIA LIVE FM NOTISIA KU BO POR KONFIA.

Share This
error: Content is protected !!