Havenkantoor huntu ku STINAPA a sondia e área, i a konstatá ku e área di Sorobon te ku Willemstoren (vuurtoren) ta e área ku ta afektá. E área ta grandi, tin kaminda e breu ta leu for di otro i tin kaminda e ta mas konsentrá. Esaki ta hasi ku e limpiesa lo tuma hopi tempu. Por lag’é e breu riba baranka seka pero mester limpia e breu den awa i riba bich. Den un siguiente komunikado nos lo partisipá e akshon ku lo tuma pa limpiesa

 

PERSBERICHT/KOMUNIKADO PA PRENSA

 

Afdeling Communicatie Openbaar Lichaam Bonaire

Telefoon: 717-5330 ext. 277 / 229 | Email: communicatie@bonairegov.com

 

            Datum: 27-05-2017

            Mesora personal di Havenkantoor a tuma medida nesesario:

            “Derame di Petrolio ku daño pa kosta di Boneiru”

Kralendijk – Dia 16 di mei, Havenkantoor a risibí informashon di STINAPA tokante manchanan di petrolio ku a spula na bichnan di Isla Los Roques ku ta keda aproksimadamente ménos 170 kilometer for di kosta ost di Boneiru. E orígen ta un derame di petrolio ku a sosodé dia 23 di aprel na Trinidad i Tobago.

Mesora a informá warda kosta, Ministerio di Infrastruktura i Medio ambiente, Havenkantoor di Aruba i Kòrsou.  Na mes momentu a pone instanshanan konserní na Boneiru i otro departamentunan di entidat públiko Boneiru tambe na altura di e situashon.

A tuma medidanan di prekoushon mirando ku tin un posibilidat ku e manchanan di petrolio por yega Boneiru. Esaki teniendo na kuenta e serkania di Los Roques. Havenmeester huntu ku wardakosta a tuma akshon pa investigá e área for di avion i “Cutter” pa averiguá si tin manchanan di petrolio biniendo direkshon di Boneiru.

Despues di un konsulta ku Rijkwaterstaat a risibí e informashon ku e petrolio ku ya tin un luna den laman lo kambia di konsistensha i forma bala di breu. Bala di breu ta petrolio ku a degradá debí na e awa di laman. Loke ta pone ku e ta difísil pa mira for di superfisie di laman, mirando ku esaki ta keda zueif nèt bou di nivel di laman.

Gobièrnu di Boneiru den persona di Havenmeester i tim, warda kosta i Stinapa lo keda monitoriá e situashon pa asina manehá esaki debidamente. Stinapa a risibí ekiponan nesesario pa hasi e bichnan limpi. Ta trata aki di hanskun, paña special pa bisti pa protehá voluntarionan un paña pa rekohé e petrolio i fòrki pa no tin nodi di mishi ku e paña sushi.  Te ainda por tuma nota ku e manchanan ta basta chikitu, nan no ta mas grandi ku diesinku centimeter.

Ta difísil pa prevení mas mancha di petrolio yega nos kosta. Gobièrnu di Boneiru ta hasi un apelashon na tur hende pa avisá Stinapa òf Havenkantoor si nota manchanan di petrolio den laman serka e kosta di Boneiru.  Laga e parti di limpiesa di esaki pa boluntarionan ku tin e ekipo adekuá. Si bo ta ke pone bo mes komo boluntario, por fabor tuma kontakto ku Stinapa òf Havenkantoor.

 

PERSBERICHT/KOMUNIKADO PA PRENSA

 

Afdeling Communicatie Openbaar Lichaam Bonaire

Telefoon: 717-5330 ext. 277 / 229 | Email: communicatie@bonairegov.com

 

            Datum: 28-05-2017

            Entidat Públiko di Boneiru huntu ku Stinapa i Selibon:

            “Tumando akshon pa manehá e konsekuensha di derame di petrolio”

Kralendijk – Tim di entidat públiko, Stinapa i Selibon ta tumando akshonnan konkreto pa manehá i minimalisá e daño di e derame di petrolio pa kostanan na parti ost di Boneiru. Manera ta konosí for djaweps balanan di breu ta yegando kostanan di Boneiru.  Gobièrnu di Boneiru a tuma akshon mesora ku a nota e peliger ku esaki por trese pa e kosta di Boneiru. Personal di havenkantoor a sòru pa e ekipo nesesario pa e tim di boluntario por hasi e limpiesa na e kostanan.

Un súplika ta bai na tur suidadano ku tuma nota di e balanan di breu pa no mishi ku esaki si bo no tin e ekipo nesesario. Mester di hanskun adekuá pa protehá bo mannan. E breu ta kontaminá i por ta tóksiko i peligroso pa bo kueru. Den kaso ku e supstansha mishi ku bo kueru, kita esaki ku sea “baby oil” òf zeta di kushina ku né. E supstansha NO ta kita ku habon òf alkohòl, usa un forma di zeta pa kita esaki.

Durante un reunion di e tim di akshon a deliniá e diferente puntonan di akshon pa minimalisá e daño ku e supstansha por kousa mundu bou di laman pero tambe paranan. E tim di akshon lo dirigí su esfuersonan na e partinan mas vulnerabel promé manera Lac, Sorobon i Lagun. Den e sitionan aki tin hopi animal ku por muri debí na e breu. Pa e motibu aki ta traha duru pa prevení esaki . Despues ku kolektá e balanan di breu, Selibon lo deshasí di esaki di un manera responsabel.

Personanan ku ta dispuesto pa yuda komo boluntario por tuma kontakto ku por fabor tuma kontakto ku Stinapa òf Havenkantoor. Ta hasi un apelashon na tur suidadanonan pa tene na kuenta ku pa por limpia e supstansha for di e bichnan mester di ekipo adekuá.

 

Share This
error: Content is protected !!