KRALENDIJK – Djabièrnè 30 di ougùstùs Kas Flamboyan Hospice Bonaire a tene un asina yama dia habri, i a duna splikashon tokante e lugá. Tanja Kokelkoren, direktor di Kas Flamoyan a splika kiko tur e kas tin pa ofresé i ken ta esnan ku por bin na remarke pa keda na e kas. “Kas Flamboyan ta manera un kas normal, kaminda un ser humano ta biba. E motibu pa un persona ta aki, debí ku e no tin un hende pa perkurá pe durante su último dianan di bida. No esei so, sinembargo un persona ku ta sufri di kebrante di salú, tambe por bin na remarke pa keda den e kas. Pues un enfermo ku no ta malu pa muri, i no tin hende pa kuid’é na kas, por hasi un petishon pa medio di dòkter di kas i huntu ku ZVK por yega na un kompromiso, pa e persona ta na e kas, ku un durashon di 3 siman,”Kokelkoren a konta. El a sigui bisa: ”E lastu dia nan di bida nos ta biba ku e persona i su famia. 24 ora por keda na e kas i ta kome i bebe e momentu nesesario. Distraishon tambe ta parti di e servisio ku nos ta duna, aparte di esaki famia i konosí ta mas ku bon bini pa bishita e persona serka nos. E lugá ta pa tur hende ku ta biba na Boneiru,”kokelkoren a konta.


Un dia a drentami pa inisiá e proyekto

Un dia diripiente a drentami un idea pa kuminsá loke mi ta hasi awe, i asina mi a buska hopi informashon kon un persona ta pasa su último dianan di bida, Kokelkoren a menshoná. El a sigui konta:”Un kantidat di informashon tabata loke mi a buska promé mi a yega na e Kas Flamboyan. E kas tin 4 kamber. Kualke suidadano por pasa na e kas buska informashon i nos tei pa yuda tur hende den nan nesesidat,”Kokelkoren a konta. Kas Flamboyan tin algu mas ku un aña i mei di eksistensia.

E enfermera i kordinadó di Kas Flaboyan
Reginalda Leonora, ta enfermera i kordinadó na Kas Flamboyan Hospice Bonaire. El a konta entre otro tokante e servisio na e kas. “Momentu un persona yega, nos ta perkurá pa e sintié na kas. E persona ta bisa kiko e ta kome i nos ta atendé pa e kome loke ta su deseo durante e ta serka nos. Kuminda mèrdia ta bin for di Fundashon Mariadal, loke ta saludabel, sinembargo e posibilidat tei pa pidi algu diferente. Na banda di esaki por kome otro kos ku ta deseá. E pashènt sèmper por sali ku un miembro di famia, dependé su forsa i animo,”e kordinadó a menshoná. 
Kon ta dil ku un persona ta fayesé.

Reginalda a sigui konta kon ta dil ku un persona ku no falta hopi dia pa fayesé. “Tin bes e ta difísil, sinembargo mester aseptá ku e persona lo no biba pa largu tempu. Ta importante pa e persona no ta sufri, pasando un final di bida bandoná. Esei ta nos satisfakshon. Un persona ku ta serka di fayesé semper ta duna amor di bèrdat. E ta sinti hopi pashon pa esnan rònt di dje,”enfermera Leonora a konta. E sentro tin mester di persona boluntario pa yuda ku tarea nan simpel. No ta rekerí konosementu kon pa atendé ku hende den fase final di bida. Nos por hasié huntu. Aserka nos sin duda, el a finalisá bisando. Riba potrèt entre otro Tanja  Reginalda.

Share This
error: Content is protected !!