Kralendijk – Sentro di bario Amboina ta operashonal atrobe. E re apertura a tuma lugá djabièrnè 30 di ougùstùs i ta parti di e programa di desaroyo di bario na Boneiru. E plan ta pa hasi e sentronan di bario aksesibel pa e pueblo.

A invitá grandinan di Villa Antonia pa apertura di sentro di bario Amboina. Promé ku e apertura ofisial, e grandinan a hasi gemastik i hunga wega bou di guia di Gwendoline Concepcion. Diputado Nina den Heyer a hasi apertura ofisial di e sentro. Diputado Den Heyer a menshoná ku e ta kontentu ku tin un sentro pa tur hende den bario.

Tambe el a menshoná di ta sinti su mes na kas den e sentro di bario huntu ku e grandinan. E grandinan tin un lugá spesial den su kurason. Diputado Den Heyer a hasi un yamada pa kuida e sentro di bario pa e keda bunita, pa asina tur hende por disfrutá pa hopi aña di dje.  

Pierre Perigault Monte ta kordinadó di programa pa desaroyo den bario. Monte a bisa ku e ta masha kontentu ku e edifisio ta ful renobá. Den oranan di mainta i di atardi tabatin un programa variá pa hende grandi, mucha i hóben di bario.

Gobièrnu di Boneiru ta felisitá bario di Amboina ku e logro.


Share This
error: Content is protected !!