KRALENDIJK – Un bia mas tremendo selebrashon 4 aniversario di Radio live FM, huntu ku 12 “Branding Partner”. Un anochi kaminda diferente agrupashon musikal a presentá riba esenario, i “One Flavas” di Kòrsou, esun spesial pa klousura di e aktividat. Algu promé  ku 10’or a presentá tur partisipante riba stage den kura di di J.C. Herrera, pa públiko sera konosí ku nan. E partisipantenan tabata:

Carlos Keller, Oscar Zuiderhoek, Ernst Goeloe, Candido Hart, Merelien Martina, Fernando Tavarez Amejo, Leomar Janga, Igmar Da Costa Gomez, Yenny Gordillo, Luz Mira de Palm, Judellange Melaan, Rochen Melaan, Nahany Martines. Luz Mira de Palm tabata e promé kende Aimed Ayubi di radio Live 99.9FM a yama riba esenario i Nahany Martines e último. Despues nan a baha for di esenario i a kontinuá ku presentashon di diferente agrupashon musikal, entre nan presentashon di Semii Marten huntu ku 2 bailarina. Mas o ménos 12‘or di anochi a yama tur 13 partisipante riba esenario i a skohe 7 for di e grupo. Nan mes a skohe un ènvelòp ku nan sentensia. Mitar di un di mardugá di djadumingu a presentá e esnan ku ta den e grupo i a laga nan mes skohe un ènvelòp, i aki 4 partisipante a kontinuá pa final i wak ken ta start e outo. Poko promé ku 2’or di mardugá, representante di Digicel Candido Hart , Igmar Da Costa Gomez di Akkermans Auto Supplies B.V, Oscar Zuiderhoek TELBO N.V. i Rochen Melaan representante di Coral Casino, tabata esnan ku a pasa pa final i wak ken por start e outo. Kada persona a skohe un yabi skondí den un bola di glas riba esenario, pa despues purba start e outo. Tur esaki a sosodé den presensia di notario Kenneth Arends durante e anochi. Promé persona kende a sinta den e outo pa purba start e tabata Candido, i e yabi no a start e vehíkulo. Despues esun di 2 tampoko no a logra, i tabata Igmar ku a start e outo. Un alegria total a reina momentu ku e outo a start. Aaron Martes di Akkermans Auto Supplies B.V, presente a keda hopi kontentu,  ku awor a yega nan turno pa bai ku e outo. Igmar resientemente a kumpra un outo nobo na Akkermans Auto Supplies B.V, i el a atendé tur kos serka Aaron, el a menshoná i awor a gana un outo. “Branding Partner” nan ku a partisipá den e kampaña di Radio Live 99.9FM tabata:

  Fundashon Wega di Number Bonaire, J.C Herrera N.V., Don Andres N.V., Maduro & Curiel’s Bank, Famoso Supermarket, NAPA Auto Parts Bonaire, Akkermans Auto Supplies B.V., Coral Casino Bonaire, TELBO, Bonaire Logistics, Digicel, Nagico insurance i Radio Live 99.9FM. Di parti di Radio Live 99.9FM danki pa e atenshon tur ku a kontribuí na e kampana i e anochi final di selebrashon.


Share This
error: Content is protected !!