KRALENDIJK – Resientemente komandante di brantwer Jan Janga a despedí di kuerpo di bombero Hulanda Karibense. Janga a traha 37 aña na brantwer i awor ku edat di 60 aña el a stòp. Durante e anochi unda Janga a topa ku invitadonan, el a dirigí palabra na tur presente bisando momentu ku el a kuminsá komo hefe kosnan tabata skruf. “Nos tabata traha bou di sirkunstansia ferfelu. Mi no ta kulpa gobièrnu pasobra nan no tabatin. Gobièrnu su prioridat e tempu aya tabata den otro kos mas importante, i no den seguridat. Nos a kai bou di “Veiligheid en Justitie, e momentu ei porta di Shelu a habri pa mi persona, pasobra momentu nan a pone lei mi dilanti, mi a bisa ahan, si ke p’ami kumpli ku tal kos, mi mester di sierto kos pa mi por kumpli. Mi a saka un kantidat di plan ku mi tabatin pone riba mesa. Poko despues Jair a presentá i huntu nos a inisiá diferente kurso ku hopi esfuerso i tempu, i nos a mira e resultado. 2 aña pasa nan a rekonosé e trahadónan i a entregá nan diploma.

A puntrami si mi tin plan riba papel pa sierto desaroyo di e kuerpo. Mi a habri maleta saka kos pone riba mesa.  Edifisio nobo, personal, kurso pa empleado i material. A pone prioridat pa e kazèrne i a dura 2 aña promé ku el a bira realidat. Durante 2 aña ku tabata konstruí e edifisio, mi tabata kontrolá i koregí. Mester a hala atenshon di e trahadónan pa kita muraya ku no tabata korekto i mas. Tur kos mi a kontrolá. Sigur dushi tempu pa a konstruí e edifisio. Awor nan ta yamami for di Hulanda i bisa; na Boneiru tin un paleis. Hendenan ta bin for di eksterior i ta hasi yalurs ku nos tin un edifisio asina bunita ku tur  fasilidat. Nan tin rason riba loke ta menshoná.  

Danki na tur esnan ku nos a traha huntu e añanan ku a pasa. Danki na mi esposa Sharin pa a kompañámi 31 aña di e 37 aña ku mi a traha na brantwer, i nos konosé otro 39 aña. Niun hende no ta para ketu i realisá, orkan ta bin den direkshon di nos islanan, na lugá di kuida mi famia na kas, ta drenta outo bai EBT, sinta huntu ku Nerry Gonzales i otronan, te mardugá pa wak kiko tur ta bai hasi pa Boneiru ku pasado di orkan den serkania. Áwaseru ta kai, bos i welek, Jan ta sali kas bai atendé kos otro kaminda. Mi a hasi esaki di mi kurason, pasobra mi tabatin Boneiru na pechu. Mi ta gradisié pa a kompañámi añanan ku a transkurí. Dushi mi ta deseá nos hopi aña mas huntu. Na kompañeronan di trabou mi ta bisa; no tur bes mi por tabata dushi dushi ku tur hende. Tin bes mi mester a trapa dede chikitu pa mi por kontinuá. Tabatin momentu ku mi mester bisabo skùif poko p’ami pasa i sigui pa desaroyonan. Nos ta un di e kuerponan mas nombra den Karibe. Un kuerpo di bombero stabil i bon prepará. Nos ta bon prepará pa kualke kos ku presentá riba e isla di Boneiru. Mi ta hopi orguyoso di boso,”Janga a menshoná. El a sigui konta:”Mi a logra tur loke tabata mi deseo, i awor no por sinta 8 ora tras di kòmpiuter. Pa e motibu aki mi ta bandoná kuerpo, sinembargo mas ainda duna chèns na hóbennan pa tuma mi tarea i kontinuá. Tin 2 ta studia na Hulanda i nos tin hopi kapasidat. Koleganan boso tin  kapasidat. Tin kòmpiuter den kazèrne pa asina boso hasi uso di nan. Sigui siña! Un manera ku Boneiru por bai dilanti ta si boso studia. Studia i ta íntegro. Boso tin un paleis dushi pa traha den. Danki di kurason p’ami por a traha huntu ku boso,”Janga e terminá bisando. Riba potrèt Jan para banda di esposa, i komandante general di brantwer Karibe Hulandes Albert Gieling. 


Share This
error: Content is protected !!