Kralendijk – Kolegio Ehekutivo a ofresé presupuesto 2020 na Konseho Insular. Dia 3 di sèptèmber a publiká esaki riba wèpsait di Entidat Públiko Boneiru pa asina tur hende por tuma nota di dje. ‘Departamentu di Finansa a traha duru pa entregá e presupuesto na tempu na Kolegio di supervishon finansiero (Cft) i pa evaluá i prosesá e rekomendashonnan ku nan a risibí bèk di Cft. E resultado ta ku nos a ofresé e presupuesto na Konseho Insular dentro di e término ku lei ta preskribí, manera nos ta hasi tambe ku tur otro obligashon di reportahe finansiero’, sigun diputado Elvis Tjin Asjoe.

‘Ku esaki departamentu di Finansa a pone un paso grandi padilanti. E último añanan no a entregá práktikamente ningun reportahe na tempu, loke a kondusí na insatisfakshon grandi di Cft i Konseho Insular. E último lunanan a desplegá hopi trabou pa rekuperá retrasonan di manera ku nos por kumpli ku obligashonnan legal. E siguiente paso ta mehorá kalidat di proseso i kontenido. Ku Cft nos a palabrá un trayekto di mehorashon tokante esaki i a stipulá esei tambe den Akuerdo Intergubernamental. Awor ku nos tin e planifikashon bou di kontròl nos ta bai traha duru riba esaki. No ta un tarea fásil, pero nos empleadonan ta hopi motivá i p’esei mi tin hopi konfiansa den esaki.’

Sifranan konfiabel ta hasi ku Kolegio Ehekutivo i Konseho Insular por tuma desishon na un manera responsabel tokante invershonnan nesesario. ‘Loke nos komo Kolegio Ehekutivo ta hasi otro, ta presupuestá reservanan pa mantenshon. Ta bunita pa traha un kaminda, pero si seguidamente bo no tin sèn pa mantenshon esei no ta yuda nos komunidat mashá. E ta zona lógiko, pero e no tabata sosodé’, segun diputado Tjin Asjoe. E no a spanta di reakshon di Cft riba e presupuesto. ‘Nos sa ku nos ta bini djaleu. Mi ta mira e rekomendashonnan di Cft komo konseho grátis. Nan ta yuda nos mehorá nos maneho finansiero. Esei ta un kondishon importante pa e bon gobernashon ku e Kolegio Ehekutivo aki ta boga p’e. Loke Cft ta hasi pa Entidat Públiko Boneiru, por sierto e provinsianan na Hulanda Oropeo ta hasi pa e munisipionan ayanan. E provinsianan ta evaluá tur presupuesto munisipal i ta duna rekomendashon i konseho pa mehorashon.

Share This
error: Content is protected !!