KRALENDIJK — Djaweps 10, djabièrnè 11, djasabra 12 i djadumingu 13 di òktober 2019 ta tuma lugá e siguiente edishon di “Vierdaagse Bonaire”. E “Vierdaagse Bonaire 2019” ta un evento deportivo i turístiko tantu pa kanadó komo pa siklista for di e edat di 5. E “Vierdaagse Bonaire 2019” ta tuma lugá durante e siman di Regata i tin un distansha total di 106 km repartí den 4 dia. Partisipantenan por skohe entre e distansha total (4 dia) òf distanshanan mas kòrtiku (1,2 òf 3 dia), dependiendo di nan kondishon físiko. E orarionan di komienso ta varia dependé di e distansha.

Meta di e “Vierdaagse Bonaire 2019” ta pa kontribuí na e kondishon fisiko i mental di e partisipante i pa atraé bishitantenan i kanadónan for di henter mundu pa e isla. E Vierdaagse Bonaire 2019 ta forma parti di e grandioso proyekto di “Vierdaagse Dutch Caribbean”, bou di kua Kòrsou i Aruba tambe ta forma parti. Partisipashon na e “Vierdaagse Bonaire” ta pa un kousa noble komo ku tur ganashi for di e “Vierdaagse” ta bai na proyektonan i aktividatnan di “Stichting Tegen Kindermishandeling”, organisashon ku ta hunga un ròl importante den yudansa na víktima, prevenshon i kombatimentu di abuzu relashonal i di mucha riba e islanan. Partisipantenan di diferente pais lo partisipá e aña aki na e “Vierdaagse Bonaire”. Diferente organisashon i skolnan ta djòin e aña aki.

RUTA “4DAAGSE BONAIRE 2019”

E ruta ta enserá un distansha total di 106 km repartí den 4 dia. Kada dia tin posibilidat pa kana sea distansha largu komo distansha kortiku. E “Vierdaagse Bonaire” ta ofresé na final di e di tres dia oportunidat pa kampamentu. Ora di komienso riba e promé dia ta Te Amo Beach EEG Blvd/Bonaire Marine Park i final riba e di dia ta Karel’s Beach Bar na Playa.

PARTISIPASHON, RESERVASHON I INSKRIPSHON

Partisipashon na “Vierdaagse Bonaire 2019” ta US$/Euro 50.00 pa adulto di 18 i mas grandi pa tur 4 dia. Partisipantenan entre 12 i 17 aña ta paga US$/Euro 20.00. Muchanan di 11 i mas yòn ta partisipá grátis. Reservashon di buelo i estadia ta posibel via “Travel Traffic” telefòn 7360305 òf 7352387, email reservations@traveltraffic.net òf traveltraffic2@gmail.com. Bo reservashon na “Travel Traffic” ta inkluí alabes bo partisipashon na “Vierdaagse”.

Inskripshon pa e “Vierdaagse Bonaire” ta tuma lugá djasabra 28 di Sèptèmber 2019 di 5 pa 9 PM na Karel’s Beach Bar òf online via e-mail vierdaagsebonaire@gmail.com. Pago ta posibel através di deposito riba kuenta Maduro & Curiel’s Bank # 33-000-000 (savings) n.n.d. “Stichting Tegen Kindermishandeling”.

Na nòmber di e organisashon nos ta ekstendé un invitashon na tur hende pa bishitá e “Beautifully Unspoiled Bonaire” durante e siman di Regata i partisipá na mes momentu na e “Vierdaagse Bonaire 2019”. Pa mas informashon òf pa “sponsorship” tuma kontakto ku e organisashon na 599-9-5221235 òf manda un meil na vierdaagsebonaire@gmail.com.

Marketing Project Vierdaagse Dutch Caribbean

Share This
error: Content is protected !!