Kralendijk – Kolegio Ehekutivo ta felisitá Miss Tourism Bonaire 2019, Rayshantaly Coffie, ku su logro den e elekshon ku a tuma lugá 7 di Sèptèmber 2019. Diputado Elvis Tjin Asjoe ta ekspresá alabes apresio i gratitut pa e organisashon di e evento, ku ta na enkargo di Tourism Corporation Bonaire (TCB) i mas spesífikamente Angelo Domacassé.

“Mi ta kere ku nos por sinti nos mes orguyoso, momentu ku wak un evento di nivel organisá pa nos propio hendenan”, asina Tjin Asjoe a bisa. Segun Tjin Asjoe e evento ta hunga un ròl importante den promoshon i merkadeo di Boneiru komo destino turístiko. Diputado Tjin Asjoe ta ekspresá su apresio, pa e manera ku Miss Tourism Bonaire 2018, Carolin Coffie, a  representá Boneiru un aña largu den promoshon i merkadeo di e isla.

“No mester lubidá ku turismo ta e pilá ekonómiko mas grandi di nos isla, i mi ta kontentu ku mi ta mira mas kara i mas di nos hendenan fungi komo embahador di nos isla,” segun diputado a bisa. “Kolegio ehekutivo tin hopi atenshon pa e industria turístiko i ta trahando pa e poblashon por saka mas probecho ekonómiko di industria di turismo, ku e Plan Stratégiko trahá pa ekspertonan di “University of Central Florida” komo guia i direkshon pa e desaroyo.

Share This
error: Content is protected !!