KRALENDIJK – Djabièrnè riba dia di Boneiru, Minister Carola Schouten, enkargá ku Agrikultura, Naturalesa i Kalidat di Kuminda na Ulanda, huntu ku gezaghèber di Boneiru a papia ku prensa relashoná ku bishita di minister. Minister Schouten a dirigí palabra e atardi i a menshoná algun punto relashoná ku su bishita na Boneiru. “Ta un plaser pa reuní na Boneiru ku diferente grupo. Nos a bishita e sitio unda ta atendé ku awa pa muha mata, pa asina por planta palu di fruta i berdura. A  papia riba algun punto pa yega na fórmulanan kon por sigui ku e proyekto. Tambe ta importante pa komunidat konta nan eksperensia i kon ta e mihó forma pa kontinuá. Huntu nos por hasié mihó. A bishita “Chicken Farm” unda a haña un bista amplio kon e situashon ta,” Minister Schouten a konta. El a finalisá bisando ku durante un fiesta relashoná ku dia di Boneiru, el a topa diferente persona i nan a interkambiá di kombersashon riba diferente punto. Mi ta bai Hulanda i atendé loke ta yuda pa e nesesidat na Boneiru, i lo regresá,” Minister Schouten a finalisá bisando. Seguidamente a papia gezaghèber di Boneiru Edison Rijna. El a menshoná ku diputado James Kroon no por tabata presente i a kontinuá bisando:” Nos a papia dos dia ku Minister Schouten huntu ku diferente grupo riba plan di maneho di naturalesa pa yega na un maneho nobo. Tambe nos tabata presente na apertura ofisial di e edifisio di DCNA, kaminda nos a hasi e parti ofisial di e lugá. Ta trata di un organisashon ku ta yuda kuida nos naturalesa, loke ta hopi importante pa nos isla. Tambe nos a papia riba diferente punto ku esnan di DCNA, entre otro asuntu di e yerba di Sargasum. Pa nos tabata un plaser pa ta huntu ku Minister Schouten, kende tabata presente durante e reunion solèm mainta trempan riba dia di Boneiru den Passangrahan, gezaghèber Rijna a menshoná.  

Share This
error: Content is protected !!