SELEBRASHON DIA DI BONEIRU, UN AKTIVIDAT DI KITA SOMBRÉ

KRALENDIJK – Djabièrnè 6 di sèptèmber ta dia di Boneiru i durante e dia tabatin 2 selebrashon. E parti di seremonia protokolar, a tuma lugá mainta pega ku Plasa Reina Wilhelmina,i atardi a kontinuá selebrashon di e parti kultural, den bario Nort di Saliña. A inisiá e mainta ku Reunion Solèm di Konseho Insular den Passangrahan. Despues a sigui ku un parada uniformá i a hisa bandera mientras himno di Boneiru tabata interpretá pa talentonan spesial, ku a duna un tremendo presentashon. Loke gezaghèber a menshoná tambe den su spich, ku esaki a emoshoné i laga awa basha di su wowo. Seguidamente a pasa pa e seremonia protokolar riba e lugá di stashoná vehíkulo pega ku Parke Wilhelmina. A kuminsá ku un orashon i bendishon na enkargo di Herbert Domacasse, i a presentá 2 kantika interpretá pa Phrase Team. Despues diskurso di gezaghebber Rijna, sigui pa presentashon di Sendion Balentin ganadó di kanta nos Boneiru hubenil aña pasá. A sigui despues ku diskurso di diputado Nina den Heyer i a kontinuá ku ganadó kanta nos Boneiru 2018. A finalisá e seremonia protokolar unda a duna Rekonosementu na suidadanonan di honor, tambe show espektakular bou di guia di Angelo Emerenciana. Un show di kita sombré Emerenciana a perkurá pe, loke esnan presente a menshoná despues di e show, i a duna un fuerte aplouso.

Share This
error: Content is protected !!