E barku di Marina Hulandes Zr.Ms. Groningen riba djaluna 25 di ougùstùs a interseptá 390 kilo di kokaina. E hecho eksitoso aki tabata den estrecho komperashon ku Wardakosta Merikano. E droganan i e tripulashon di e barku interseptá a keda entregá na outoridatnan Merikano pa sigui ku e enhuisiamentu.
E barku di patruya Zr.Ms. Groningen for di aprel di a aña aki ta aktivo den Area di Karibe. E barku patruyero ta aktua kontra di tráfiko di droga i por keda empleá pa yudansa humanitario. Ademas di esei e barku ta keda empleá den diferente tareanan di Wardakosta den área di Karibe, tal manera interseptá peska ilegal, delitonan kontra di medio ambiente i pa akshonnan di reskate.
Pa por ehersé e tareanan aki e barku ta ekipá ku un helikopter ‘NH90-boordhelikopter’ di e Komando di Helikopter di Defensa, i dos barku di intersepshon FRISC. En konekshon ku e finalisashon hudisial di e kaso, tabata posibel te ku aworaki numa pa saka e informashon aki.
Kambio di Tripulashon
Desde aprel 2019 Marina Real Hulandes a kuminsá ku un programa ‘piloto’ den kua e barku Patruyero Zr.Ms. Groningen ta permanesé dos aña den Area di Karibe, i e tripulashon ta kambia den su totalidat. Antes tambe e barku tabata keda kambiá na okashon di kada rotashon. Durante un seremonia simpel awe e tripulashon a keda kambiá i e Komando a keda traspasá pa e Komandante nobo. Esaki a sosedé simbólikamente ku traspaso di un yabi grandi di e Komandante saliente, Kapitan-Luitenant Ter Zee Lex van der Kraan (Tripulashon Blou) na e Komandante entrante Kapitan- luitenant ter zee Nicole Kuipers (Tripulashon Blanku).
Tripulashon Blou durante di su estadia a kumpli ku seis intersepshon di droga, durante kua kasi 3500 kilo a keda interseptá. E tripulashon a ehersé sinku akshon di reskate den kua 57 persona a keda salbá for di den laman. E barku den esaki a traha huntu ku tantu Wardakosta Karibe komo tambe Wardakosta Merikano i e ‘Joint Interagency Taskforce South’.
FUENTE:WARDAKOSTA/LIVE FM
