Kralendijk – Minister Carola Schouten, enkargá ku Agrikultura, Naturalesa i Kalidat di Kuminda na Ulanda, huntu ku gezaghèber di Boneiru, a hasi apertura ofisina di e edifisio nobo di Dutch Caribbean Nature Alliance (DCNA). Esaki a tuma lugá durante bishita di trabou di Mineister Schouten na Boneiru. DCNA ta sumamente honrá ku e bishita spesial. A hasi uzo di e oportunidat pa boga pa partisipashon di tur seis isla ku ta forma parti di Reino Ulandes, na proyekto i plannan pa maneho di naturalesa den Karibe Ulandes. Yamada urgente pa apoyo na tur isla, ku ta pertenesé na Reino Ulandes konosé diferente habitá, manera ref di koral, mondi di palu di mangel, sierto tipo di vegetashon bou di awa, neblina tropikal, selva tropikal i kueba ku un grado sumamente haltu di biodiversidat i kantidat di sorto di mata i bestia. E habitat aki ta bou di preshon enorme. Preshon kousá pa hende, ku ta manifestá su mes den un eko sistema frágil i ku hopi espesie den peliger di ekstinshon. E organisashonnan pa maneho di naturalesa tin mester di mas sosten di gobièrnu lokal i di Ulanda, meskos ku sosten di Oropa, pa por protehá e naturalesa úniko di nos region. E sosten aki tin un grado di urgensia haltu, esaki a keda menshoná entre otro durante apertura ofisial di e edifisio nobo di DCNA. Despues ku a revelá e entrada di e ofisina, gezaghèber Rijna a dirigí algun palabra.



“Boneiru tin un naturalesa impreshonante. Ta importante pa DCNA sinta na mesa ku  profeshonalnan pa yega na formanan stabil pa sigui protehá i stabilisá nos área di naturalesa,”tabata entre otro loke el a menshoná. Despues a dirigí palabra minister Schouten. El a ekspresá kon kontentu e ta di bishita na Boneiru. “Mi no ta na Boneiru pa solamente apertura di e edifisio nobo. Huntu ku DCNA nos a sinta i papia diferente tópiko, pa wak kiko ta e nesesidat i yuda den esaki. Tin kos riba papel i awor mester tuma akshon,” el a menshoná. Despues a pasa den e edifisio nobo, i a dirigí palabra direktor di DCNA Hellen van der Wal. Seguidamente i a ilustrá pa medio di grabashon di video gran parti di Boneiru spesialmente e parti di naturalesa. Na final di e parti ofisial a entrega regalo na algun persona entre nan Minister Schouten i e tambe a entrega regalo na van der Wal, direktor di DCNA. 




Share This
error: Content is protected !!