KRALENDIJK – Luna di Sèptèmber ta luna mundial di Alzheimer, i relashoná ku esaki Fundashon Alzheimer Bonaire a organisá un aktividat ku a karga e nòmber “Let’s Talk About Dementia”. Laga nos ban papia di Demensia. E fundashon a invitá algun miembro di prensa i algun persona konosí den komunidat, i diputado Nina den Heyer pa forma parti di e aktividat. Presidente di Fundashon Alzheimer Bonaire, Evert Piar, a papia ku tur presente i despues a splika e meta di e aktividat. Demensia ta loke ántes nos tabata tende hende menshoná ku un persona a bira “verkalk”. E palabra korekto ta Demensia. Esaki ta nifiká ku e persona ta lubidá hopi, spesialmente loke el a kaba hasi algun minüt pasa. E persona ku ta sufri di Demensia tin bes pa un hende ku no ta hopi yegá di e persona, e por kombersá ku e hende ku ta lubidá kos, sin tuma nota di esaki. Un persona ku Demensia den promé fase ta lubidá loke el a kaba di hasi òf papia, sinembargo e ta kòrdá pasado bon bon. Ta importante pa informá tokante Demensia, kiko e ta, i mas importante, kon atendé ku persona ku ta sufri di e malesa. Demensia por toka porta di tur hende i no ta importá edat. Un persona ku e enfermedat di Demensia, mester dun’é atenshon, spesialmente ku amor. No por koregí un persona ku ta sufri di Demensia. Ta importante pa deskubrí si un hende tin e malesa, mas importante pa papia ku otro hende di e malesa. Esaki por yuda tantu e persona ku Demensia i e famia. Un hende ku e enfermedat, ta aktua loke e por i tei ainda bon den su mente, e parti ku no ta funshoná, ta pone ku mayoria bia e ta aktua inkorekto, loke por ta hopi peligroso. Mas hende sa di esun ku tin e malesa, por yuda tira bista òf si topa e persona ta aktuando straño, por yud’é. Tur esaki i hopi mas informashon a elaborá riba dje durante e mainta. Ta bai tin mas informashon durante e luna di sèptèmber relashoná ku luna di Demensia mundialmente. Kombinashon di potrèt ta ilustrá e diferente tarea ku a tuma lugá e mainta na Pasadia Villa Antonia djasabra 7 di sèptèmber

Share This
error: Content is protected !!