KRALENDIJK – Djasabra último 7 di Sèptèmber 2019 den sala di Courtyard By Marriot Resort yen yen di hende, Tourism Corporation Bonaire a organisá elekshon Miss Tourism Bonaire 2019. Un evento sigur ku a hala hopi atenshon i a bira un aktividat úniko i espektakular. E show a inisiá i terminá e ora stipulá. E show den su totalidat a kana hopi bon. Partisipantenan tabata tin 3 presentashon ofisial, trahe uniformá, ku tabata spich, Trahe di Baño uniformá i trahe di gala ku nan a risibí un pregunta, e parti no ofisial ku e apertura tabata hopi impreshonante i espektakular. Den e ambiente di “Glamour Night Extravaganza” den un tremendo koreografia i baile ku tabata na enkargo di Angelo Domacasse. E grupo di baile “Dominican Dancers” a bolbe skor haltu ku nan presentashon den e apertura kompañá pa 5 kandidata, un presentashon riba nivel huntu ku Carolin Coffie.

MC pa e anochi di Miss Tourism Bonaire tabata Carlton Jansen for di Kòrsou ku a hasi un trabou fenomenal.

Tur e 5 partisipante nan a lusi enormemente i a duna e kuerpo di huradonan, konsistí di profeshonalnan, doló di kabes.

Den e parti di shou tabata tin nos artistanan lokal Capella Chirino, Gerald Alberto, Jurick Clarenda, Zahid Frans i for di hermana isla Kòrsou, e konosido Dibo Doran, kende sigur a duna un bon presentashon.

E resultado final di Miss Tourism Bonaire 2019:

• Lorienny Mercera di 4 Finalista Miss Tourism Bonaire 2019 i tambe Miss Press Bonaire.

• Katherine Montero di 3 Finalista Miss Tourism Bonaire 2019 i a bai ku Miss Fotogenika, Miss Internet Bonaire 2019 i Miss Best Body 2019.

• Ewellin Lambert di 2 Finalista Miss Tourism Bonaire 2019 i  alabes Miss Disiplina  2019.

• Shanyvienne Seraus  a bai ku e premio 1 Finalista Miss Tourism Bonaire 2019 i alabes Miss Elegansia i Miss Model Bonaire 2019.

• Rayshantaly Coffie a bai ku e premio máximo ku ta Miss Tourism Bonaire 2019 y albes Miss Best Speech, Miss Popular, Miss Smile, Miss Interview , Miss Tour Guide y Miss Nature Ambasador 2019.

Pa promé aña TCB a eligí un Mister Tourism Bonaire 2019, ku a resultá Deangelo Martijn.

Tourism Corporation Bonaire (TCB) por mira bèk un otro produkto riba nivel ku a keda presentá djasabra último.

TCB ta gradisí tur esnan ku di un òf otro manera a koperá ku e sertámen di Miss Tourism Bonaire 2019, ku sigur tabata eksitoso, diferente i úniko. Pabien na nos Miss Tourism Bonaire 2019, esun ku ta bai ta kara di Bonaire i representá TCB den aktividatnan di promoshon pa Bonaire lokal i internashonal.

Share This
error: Content is protected !!