KRALENDIJK – Djadumingu 8 di Sèptèmber tabatin selebrashon grandi na parokia La Bírgen di Coromoto. Bírgen Maria di Coromoto tabata di fiesta i pa e okashon aki, tur pader katóliko di Boneiru, a uni pa un Santu Sakrifisio di misa grandi na Antriol. Na komienso di Santa Eukarisita, Pader Alphonsus Baak a presentá tur pader, i a menshoná ku tin un seminarista spesial di Ivoorkust, Africa presente, den e selebrashon di e dia. Daniel Coulibaly ta nòmber di e seminarista, i huntu ku pader Ivan Dario Perez Gomez, pader Ranolfo Goneda i pader Vikario Santiago Malagon, huntu nan a hasi e selebrashon e mainta. Misa tabata kan kan di hende i hopi sinta pafó di edifisio.  Lektor Akólito Alejandro Rodriquez i Feliz Nicolaas tambe a forma parti di e otronan na altar. Despues di a drenta misa den proseshon, a kontinuá ku predikashi kaminda entre otro Pader Baak a papia bisando kon leu nan komo pader ta for di nan famia. “Nos a bandoná famia pa papia palabra di Señor pa otronan. Hende no mester buska un krus pa kara sinembargo karga e krus. Nene Provans a trese e idea pa un kapèl, loke no a bira un realidat, sinembargo obispu di e tempu a proponé pa un edifisio unda ta hasi misa, un lugá simpel kaminda nos ta awe.  No ta un basílika,”pader Baak a bisa. “Nos ta hende bendishoná i poko malkriá. Hopi selebrashon tin, entre otro dia di Boneiru, dia spesial pa Kabritu, i kisas pronto por spera dia di buriku.” Parokianonan a hari momentu pader a menshoná esaki. El a menshoná ku solamente 5 % di komunidat katóliko ta bishita iglesia, loke ta poko i mester hasi algu pa fortifik’é. Na final di misa el a yama danki na tur pa e sosten na parokia i ta keda tras di kortina. Nan ta pèrkurá pa nos por selebrá entre otro fiesta di awe.

Share This
error: Content is protected !!