KRALENDIJK – Reinier van Zutphen di ombudsman a papia ku prensa  loke nan a pone den rapòrt ku el a traha resientemente. Ta trata mas spesífiko e punto di atenshon riba situashon di e hende di edat, esta e ansiano, su forma di biba riba Boneiru, Sint Eustatius i Saba. “E miserabel 644 dòler ku e persona ta risibí pa luna no ta yega. Nos ta duna hopi atenshon hendenan di edat. Hopi a keda skirbi sinembargo den práktika nada. Tur kos ta keda na palabra. Tur kos ta skirbi riba nos “webpage” unda por haña un bista amplio di e situashon, kon miserabel e hende ta biba.
Hopi hende ta biba sin kos pa kome, no tin un situashon na kas manera mester ta. Djis imaginá nan no tin un kushina, wc, no por laba paña i mas. Promé kos ku mester sosodé, ta perkurá pa e hende tin kos pa kome awor. Kisas e hende mester di mas sen, of otro forma pa nan sobrebibí stabil, mester perkurá pa nan ta biba bon. Mester sinta awor na mesa pa atendé e situashon. Otro kos poko atenshon pa hende ku Demensia i diferente otro enfermedat, ku no ta risibí e trato apropiá.
E hende di edat no por kumpra den supermarket. Tin hende enfermo i mester di yudansa. E kuminda barata no ta saludabel, produktonan yen di suku loke ta malu pa salú di hende. E produkto saludabel ta hopi karu. Tur esakinan ta spliká den detaye den e rapòrt,” van Zutphen a menshoná. El a sigui konta:”  Ta pensa ku despues di 10.10.10. kos lo a bira mihó, loke no ta e kaso.
No ta komprondé kiko ta e motibu ku ta dura asina tantu tempu pa kos kambia i bira igual i stabil manera ta e kaso na Hulanda. Tin bes karta nan ta yega serka e hende di edat i nan mester tuma nota di algu na hulandes i no ta komprondé. E forma aki no ta korekto. Nos mester di yudansa urgente pa BES Eilanden. Hopi posibilidat ku tin na Hulanda BES Eilanden no ta disponé di esaki. No lubidá tin hopi kos ku no ta na òrdu i ta loke e hende tin derecho pe.  Nos ta papia di BES Eilanden, sinembargo Aruba i Kòrsou ta den mes situashon. Un ehèmpel den e rapòrt tin un kaso unda un enfermera a bishita un kliente i el a puntra e persona dikon e no a bebe remedi? E persona a kontest’é: Pasobra mi no tin kuminda pa kome promé ku por bebe e remedi.  E situashon ta serio, van Zutphen a bisa. “ Mi a papia ku diferente persona i awor ta momentu pa tende kon ta bai kuminsá pa mira kon drecha e situashon. A skirbi hopi i awor mester ehekutá.
E hende di edat mester tin kuminda tur dia riba mesa!”

Share This
error: Content is protected !!