KRALENDIJK – James Finies di “Nos ke Boneiru Bèk” a yama miembronan di prensa pa papia loke a sosodé dia 6 di Sèptèmber ultimo. Davika Bissesar presidente di “We Dare To Care Foundation” a papia promé i despues James Finies a dirigí palabra. Bissesar a menshoná ku nan ta sostené fundashon “Nos Ke Boneiru Bèk”. “Niun momentu no a falta rèspèt ku niun hende. Finies na su turno a bisa ku nan a detené ku forsa brutu den presensia di diferente mandatario for di eksterior, kende tabata na Boneiru en konekshon ku selebrashon di Dia di Boneiru.
“Pa nos ta nesesario pa papia awe mirando loke a sali den prensa no ta kompletu. Nos tin otro banda di e storia. Mi ke pa yuda kondená e motibu di mi aresto. Esaki no tabata nesesario. No ta promé bes nos ta manifestá, nunka a arestámi. Promé bia nos a pidi pèrmit pa manifestá. No mester pidi pèrmit, sinembargo nos a hasié tòg i a tene kuenta ku tur regla entre otro, no stroba tráfiko òf trese un ser humano den peliger, tampoko krea algu violento. Gezaghèber no mester duna niun hende pèrmit pa protestá. Nos a hasi tur kos ku tabata mester pa asina por protestá na e sitio. Un anochi promé ku 6 di sèptèmber a trese un karta pa ami. Nos tabata ke a papia ku gezaghèber Edison Rijna, pa splik’é loke nos ta bai hasi riba e dia, esta parti un korant nobo “Nos Bèrdat” ku nos ta bai traha tur luna. Esaki no a logra pa papia ku gezaghèber. Dia 6 nos a bai na e sitio pa a manifestá. E karta ku nos a risibí ta un kontrakt ku nos tin pa por manifestá. E karta ta bisa ku por manifestá na Parke Wilhelmina, entre otro kaminda nos a stashoná.  Nos a para na banda pa nos no stroba niun hende. A pone un mesa i un pòpchi yama “Bob”, ku un tíshùrt i riba e mesa tabatin e korant ku nos ta bai estrená i parti riba e dia. Riba e flanèl di e pochi tin skirbi: Support Bonaire ‘No=No’.

Nos no a bai ku bòrchi pa manifestá na e sitio. Agente polisial Mercelina a aserka nos i a bisa ku mester para mas ayabanda. El a saka un karta i a papia i mi a bisé ku no tin skirbí unda spesífiko nos mester para. Nos no ta aki pa hasi bochincha. Nos tei pa parti e korant nobo ku nos a traha. Nos a bisé pa bai papia ku gezaghèber i esaki no a sosodé. Nos a manifestá hopi i nunka kos a sali for di man. Mercelina a regresá i huntu ku un otro agente polisial a detené mi persona. Den e karta ta bisa ku momentu ku e apertura ofisial di dia di Boneiru ta tuma lugá, nos no por kanta, grita òf stroba e aktividat,”James a konta. El a sigui bisa:”Nan a kuminsá kita mi kosnan i un polis a bisa e ta detenémi. Niun momentu mi a protesta kontra e detenshon. Nan a bira mi man i a bui mi. Diferente polis a tenemi pa bui mi innesesariamente. Nan a tenemi den prison te 5 minüt pasa di 2’or di mèrdia e mes un dia. Promé bes den mi bida ami a drenta prison. Mi a bisa nan ku mi ta aki den pasobra mi ta lucha pa derecho di boso tur, mi a bisa e polisnan. Nan a splikami ku mi tin derecho di abogado i a bisa ku ta bai interogámi. Mi no ta deseá nunka pa un hende bai prison. Nada agradabel,” James di NKBB a bisa prensa. El a sigui papia i a konta loke a sosodé ku su mama relashoná ku e detenshon.

“Mi mama sinta ta wak televishon a tuma nota kon polis a detenémi, loke a shòk e, i el a bai hospital,”James a konta.

“Abogadonan a bin prison i a bisa esaki ta un abusu, esta ku a detenémi ponemi den prison. No tabatin niun motibu pa detené mi persona. Esaki ta mustra ku na Boneiru nos no ta un isla liber. Na Venezuela i otro paisnan grandi tin protesta tur dia. Nos ta funshoná totalmente robes na Boneiru. E kos no ta keda te aki, “James a menshoná. Nos ya a haña sosten di paisnan grandi ku loke a sosodé ku no ta kuadra ku derecho humano,”James a finalisá bisando. Na final el a presentá e korant “Nos Bèrdat”, i a entrega algun kopia pa miembronan di prensa. Un bia pa luna ta bai saka e korant.

Share This
error: Content is protected !!