Riba djasabra 21 di sèptèmber 2019 Selibon N.V. huntu ku Blue Destination i Fundashon Boneiru Limpi i Bunita ta organisá e evento yamá ‘World Clean Up Day’, kaminda Selibon N.V. kier konsientisá riba limpiesa i mantenshon di bario. 

Nos mishon ta pa konsientisá pueblo boneriano  riba e problema di shushi gròf i glas ku tin riba nos isla.  No ta solamente responsabilidat di Selibon  pa tene nos isla limpi, pero ta responsabilidat tambe di kada un di nos ku ta biba na Boneiru. E aña aki nos lo konsentrá den e barionan históriko di Boneiru: Tera Kòrá, Nikiboko, Playa, Antriol, Nort’i Saliña i Rincon i tambe na Playa Frans i Lac.   

Shushi gròf ta shushi ku konsientemente òf inkonsientemente hendenan ta benta den nos medio ambiente manera riba kaya públiko,  riba bich i den mondi. Shushi gròf ta konsistí di muebel, shushi di kurá, kolchon i tur artefakto ku  hende ta dùmp den naturalesa. Nos ta tuma tur tipo di heru tambe (frishidèr, frizer, stof, kama i stul di heru etc.) pero poné na banda di e ‘puinbak’ (baki grandi pa tira shushi gròf aden), NO den e ‘puinbak’. Tiramentu di shushi gròf den medio ambiente ta un problema hopi grandi na Boneiru. Pa e motibu aki Selibon ke pone énfasis riba e dia di akshon ‘World Clean Up Day 2019’ pa konsientisá nos komunidat di Boneiru.  

Manera nos a bisa nos ta bai konsentrá den bario. Nos ta bai pone ‘puinbak’ i ‘glasbol’ den nos barionan i tur hende por hiba nan shushi na e sitio ei na un manera organisá. Ora ku e ‘puinbak’  yena por pone shushi  na banda. Djaluna SELIBON ta rekohé tur kos ku habitantenan entregá na e sitio. Nos ta anunsiá na radio i pone riba facebook na unda nos ta pone ‘puinbak’ i ‘glasbak’. Si bo ta un boluntario  ku ke duna un man i yuda tene bo propio bario limpi, por fabor tuma kontakto ku nos bali di informashon.

Pa kualke pregunta adishonal tuma kontakto libramente ku nos i si bo tin algun idea, esaki semper ta keda apresiá. 

Huntu nos por logra mas!

Share This
error: Content is protected !!