GEZAGHÈBER A STÒP KAREDA DI GAROSHI LEGAL I A ASEPTÁ PA KORE ILEGAL?

0 Comment


KRALENDIJK – Un suidadano di Rincon ku entre otro no ta amante di pustamentu di garoshi ta remarka loke el a tende na radio awe mainta. Gezaghèber Edison Rijna a stòp kareda di garoshi legal i aseptá pa kore ilegal? Ta trata di e reakshon di gezaghèber di Boneiru Edison Rijna. El a pidi pa publiká esaki pa tende dikon apesar ku a stòp kareda di garoshi, pa motibu di seguridat, tòg e pustamentu a tuma lugá.  “Personalmente mi no ta amante di pustamentu di garoshi, sinembargo mi mester bisa mi no tin nada kontra e asuntu, esta e aktividat na Subi di Karpata. Awor mi ta tende ku e aktividat no a tuma lugá, loke ta straño. Dia 7 di sèptèmber último, entre mèrdia pa atardi e kaya tabata sera i tabatin hopi hende na e sitio, i mi a komprondé ku tabatin pustamentu di garoshi. Tin algu ku no ta komprendibel, pasobra gezaghèber Rijna ta menshoná tokante aktividat, i ta bisa, debí ku e tim di supervishon konsistí di Entidat Públiko Boneiru, Kuerpo Polisial Hulanda Karibense i Kuerpo di Bombero Hulanda Karibense a konstatá ku e organisadó no a kumpli i a stòp e aktividat.

Kareda a kontinuá i segun ami tur kos a bai bon. Mi no a tende nada di desgrasia,”e suidadano a bisa. “Ta interesante pa tende dikon e kareda a kontinuá, apesar ku a bisa e parti seguridat no ta na òrdu. Kisas no tabata ke pa ‘Burnout Speed Foundation’ a organisá e kareda? Si a stòp e organisashon, dikon no a habri kaya pa outomobilistanan, i pidi e organisadó di ‘Burnout Speed Foundation’ pa kuminsá kita tur loke tin na e sitio. Anto si algu lo a sosodé despues di 12:30 na e sitio, ken tabata responsabel? Gobièrnu di Boneiru òf ‘Burnout Speed Foundatio,” e suidadano ta puntra. Ta interesante pa tende un reakshon di gezaghèber e suidadano a finalisá bisando.

Share This