GINEKÓLOGO TA PIDI PASHÈNT UN TRADUKTOR

0 Comment


KRALENDIJK – Un suidadano Dominicano ya mas ku 10 aña bibando na Boneiru, desgustá a presentá awe na Radio Live 99.9 FM, pa papia di loke a sosodé ku su persona na Fundashon Mariadal(FM). El a konta ku ya el a pèrdè 2 sita ku dòkter, pa motibu ku nan no ta komprondé idioma spañó i no por komuniká ku e pashènt.

“Ayera djaweps ta di 2 sita ku mi tabatin ku Ginekólogo na Fundashon Mariadal. Momentu ku mi a presentá serka e Ginekólogo, mi persona a tende ku no por atendé mi pasobra nan no ta komprondé idioma spañó. E kos a kuminsá kansami. Mi no ta un persona ku ta gusta reklamá, sinembargo loke a sosodé ya pa di 2 bes ta inkomprendibel, ”e suidadano a konta. El a sigui bisa: ”Tin Boneriano ku tampoko ta komprondé hulandes òf por papia hulandes bon pa splika dòkter nan malesa. Kon ta atendé ku nan? Na hospital nan a bisami buska un traduktor i bin serka dòkter kuné pa e tradusí na hulandes loke ami ta splika na spañó. Esaki no ta korekto, i sigun ami si un dòkter no ta komprondé un idioma, nan mester perkurá pa un traduktor pa komprondé e pashènt pa e dòkter. Radio Live 99.9 FM a pidi reakshon di parti di FM i ta pendiente pa un kontesta.

Share This