KRALENDIJK — Djasabra trempan di mainta a sosodé un aksidente, unda un vehíkulo a pèrdè kòntròl i dal den kashi di koriente na e tereno pa praktiká futbòl yamá “Chio Semeleer” den bario Nort di Saliña.
Polis a presentá na e sitio di aksidente i despues di un kontròl, a laga e shofùr saka e outo ku “takelwagen” i hiba e vehíkulo kas.
Daño material na e kashi di koriente ta konsiderabel. E konekshon di lus pa e tereno di práktika futbòl a keda den un situashon deplorabel.
Un situashon peligroso awor na e fèlt, mirando ku un parti di e kura di aluminio a dobla bai paden i por ta peligroso pa esnan ku ta hasi uso di e tereno.
Probablemente mester kita koriente temporalmente for di e tereno pa por drecha e kashi di koriente i normalisá e situashon. Potrèt ta ilustrá kon e vehíkulo a destruí e kashi di koriente fin di siman tras di lomba.
