KRALENDIJK – Habitante nan di Kaya Nikiboko Suit ta pidi ousilio, e forma kon e shofùrnan di trùk ta kore. Spesialmente e área entre rotònde pega ku Supermarket van Den Tweel bai pariba direkshon di Sorobon. Un forma hopi iresponsabel e shofùrnan ta manehá e trùk, baha kaminda pa no dal den otro, sin tene kuenta ku hende na pia òf riba baiskel. Ta spera polis asumí nan responsabilidat i aktua ku e situashon. Un señora ku ta biba riba e kaya aki a splika ku esaki ta sosodé spesialmente momentu ku tin barku di santu na waf i mester transportá e santu di waf pa e sitio kaminda ta pone e santu. E parti di stòf no ta kos di papia di dje. Un desaster, e señora a konta i el a bisa pa esnan konserní atendé e asuntu promé algu lamentabel sosodé pa e forma ku shofùrnan ta trafiká ku e dòmtrùk spesialmente riba kaya Nikiboko Suit. Radio Live 99.9 FM aparte di e señora ku a presentá na ofisina i splika di e situashon, tin diferente hende mas a saka potrèt i grabashon pa informá di e situashon. Ta importante pa tuma nota di e situashon i hala atenshon di shofùrnan di dòmtrùk. Tin algun potrèt di dòmtrùk, sinembargo e potrèt no ta ilustrá spesialmente e trùknan  ku tabata kore iresponsabel. Si ta trata di dòmtrùk ku tabata trafiká djabièrnè durante dia.

Share This
error: Content is protected !!