KRALENDIJK – Suidadano Jeffrey Scoop ta papia di un eksperensia ku e tin ku Sandoval, spesialista di wowo na Boneiru, kende a pone vários pashènt riba “blacklist”. Pues e hendenan no por bishita un spesialista di wowo pa trato médiko na Boneiru òf eksterior. Scoop a konta ku 4 aña pasá el a hañ’é den un aksidente di vürwèrk i mester a bai Colombia pa tratamentu. “Mi a bai Colombia i a keda bou di tratamentu kada tres luna. Esaki a kontinuá te aña pasá luna di yanüari. Aña pasá un spesialista di wowo na Boneiru a sigui atendémi. Pues, no mester a bai Colombia. Na luna di mart aña pasá algu a sali den mi wowo. Mi a saka potrèt manda un potrèt Colombia i nan a pidi aya pa mi bin Colombia poko rápido. Mi a aserka e spesialista di wowo na Boneiru, Sandoval i splik’é pa mi por bai mas promé ku e fecha ku nan a pone p’ami persona. Mi a bai serka e spesialista i a splik’é loke tin den mi wowo. E spesialista a bisami si mi deseo ta pa ponemi riba un buelo urgente pa Colombia? Mi a bisé lag’é numa mi ta bai te aki dos siman. E spesialista a lanta i a bisa ku mi ta bira ‘onbeskòp’. Ami i mi eks kasa a lanta pa bai kas, i Sandoval a bisami e mes ta tuma kontakto ku Theo van Brake direktor di e hospital,” Scoop a konta.

El a sigui bisa:” Mi a bai Colombia i regresá i a entrega resultado na ofisina di dòkter wowo. Den luna di yüni mi a haña un sita i a ripara ku tin algu straño a sosodé na ofisina di e spesialista di wowo. Un persona a bai mi dilanti despues tabata mi turno. Mi a sinta warda, i ora e persona a sali, nan no a yamami. Mi a keda sinta pafó warda sin nada a sosodé. Hopi despues e spesialista a sali i a tuma mi papelnan i bisa despues nos ta atendé. Ougùstùs mi a bai i despues mester a bolbe bai novèmber Colombia. Novèmber 2018 mi tabata na Colombia pa algu personal, i nan a bisami bin Boneiru i nan ta regla pa mi bolbe bai Colombia. Mi a yega Boneiru i bai buska papelnan pa atendé mi biahe pa Colombia nan a bisami, a para tur kos pasobra aki mes tin un spesialista ku por hasi e trabou pa mi wowo. Mi a puntra ZVK kiko a pasa? E dòkter, esta e spesialista no ta un spesialisá ku por yudami. ‘Artikel 10 .4’ ta bisa si bo ta bai pa tratamentu médiko den eksterior i despues ZVK ta paga tur gastu mara na sierto kondishon. Mi a manda un karta pa e  direktor di FM, Theo Brakel i pa e doktorá i Judith di departamentu di keho. Mi a bisa nan den e karta ku tin un situashon ku nan a tratami malu i no a firma p’ami bai den eksterior. Aki no tin spesialista ku ta traha ku nervio di wowo. Mi a pidi pa via di Theo traha algu pa mi por bai dòkter na Colombia.  Pa mi sorpresa mi a topa e señora ku a traha e sita pa bai e doktorá, i el a bisami ku el a haña problema i nan a kambia su sitio di traha. E señora no tabata sa ku nan a pone mi nòmber riba “Blacklist”, i el a hañ’é ku problema ku Sandoval,”Scoop a konta. El a sigui bisa:”E aña aki fin di febrüari mi a haña sita ku Judith i Theo di ofisina di keho. P’ami sorpresa nan a tende kiko doktorá a konta di e loke a sosodé, entre ami i e doktorá, i for di momentu ku mi a kuminsá papai, mi tabata sa ku ami ta robes segun nan,”Scoop a konta. “Kon un spesialista ta pone un pashènt riba “blacklist” i ofisina di keho no ta hasi nada. Mi a bisa nan warda mi ta bai studia e kos aki. Na final di e kombersashon a disidí pa bai serka e doktorá i ami a nenga. Loke Theo a bisa ta ku nos a menasa e doktorá loke no ta bèrdat. ZVK tambe a manda un karta i bisa, si mi no ta kontentu mi por bai ‘bezwaar’ ku loke mi no ta di akuerdo. Mi no a hasi esaki pasobra e problema no ta ZVK, sino e spesialista.  E spesialista a gaña ku nos a menas’é. Awor ya un aña kaba ku mi no a haña tratamentu p’ami wowo. Pa falta di konsiensia mi no ta regresá serka e spesialista aki na Boneiru. Mi a sigui buska mi derecho i mart mi a manda un karta Ombudsman i el a tuma e kaso i a aserka ZVK, i e mes un kos ku for di prinsipio mi a tuma, esta no bai ‘bezwaar’ ku ZVK. E problema no ta ZVK , sinembargo e spesialista. Mi a warda hopi pa trese esaki den publisidat. No ta mi so ta den diskushon kuné. Hopi hende tin problema ku e spesialista aki i ta riba ‘blacklist’. Ombudsman a konsehámi pa bai ‘ministerie van volk gezondhied’, pasobra no por nenga suidadano tratamentu médiko,”Scoop a finalisá bisando. 

Share This
error: Content is protected !!