Kralendijk – Tadzio Bervoets lo ta na kabes di Dutch Caribbean Nature Alliance entrante 1 di òktober 2019. Dutch Caribbean Nature Alliance (DCNA), ta un aliansa regional di organisashonnan pa konservashon di naturalesa, inkluyendo e parkenan nashonal na tur seis isla di Caribe Hulandes. A lanta DCNA ku e intenshon pa sosten y fortalesa naturalesa riba e islanan. Tadzio Bervoets tabata e Manager di St. Maarten Nature Foundation, un di DCNA su miembronan. Señor Bervoets ta amplia: “Despues di a traha pa kasi 10 aña na Sint Maarten Nature Foundation, kaminda mi tabatin e honor di ta parti di e movementu pa konservashon di naturalesa, awor mi eksperensia ta rekerí no solamente pa sosten kuido di naturalesa na Sint Maarten, pero na tur otro isla di Caribe Hulandes. DCNA su propósito ta pa protehá e rekursonan biológiko ekstenso y promové desaroyo duradero di e rekursonan natural di e islanan, tango riba tera komo den awa.” “Mi trabou na Sint Maarten tabata un reto, pero mi ta orguyoso di por a hunga un ròl den establesementu di e “Marine Park”. Mi ta orguyoso tambe di por a establesé “Mullet Pond” den “Simpson Bay Lagoon” komo un área protehá y di por tabata envolví den aktividatnan pa konservashon dirigié riba edukashon tokante naturalesa, protekshon di turtuga di awa, tribon, mamíferonan di laman, otro espesienan i otro áreanan. Tabata sin mas un plaser pa a traha na un organisashon di e índole aki. Awor mi ta ansioso pa traha ku direktiva, partnernan i sekretariado di DCNA pa sostené aktividatnan pa konservá naturalesa den Karibe Ulandes den su totalidat. Tambe mi tin hopi deseo di mira komunidat di Sint Maarten sigui sostené e trabou ku Sint Maarten Nature Foundation i su Mènedjer interino, Melanie Meijer zu Schlochtern, ta hasi”, Bervoets a sigui bisa. Hellen van der Wal, Presidente di Direktiva di DCNA a indiká ku despues di kasi 10 aña di servisio ehemplar komo Mènedjer na Nature Foundation Sint Maarten, Bervoets a aseptá un reto nobo komo Direktor Ehekutivo interino di DCNA entrante òktober 2019. “Sostené pa e parkenan na e seis islanan i miembronan di direktiva di DCNA, Tadzio lo liderá e esfuersonan pa estrechá lasonan no solamente den Karibe Ulandes, pero den region i na Ulanda tambe, desaroyando relashonnan di trabou ku ministerionan ulandes i organisashonnan di nivel haltu den konservashon di naturalesa manera: “International Union for the Conservation of Nature”, “Bird Conservation Netherlands” i “World Wildlife Fund”. Tadzio lo traha huntu ku e direktiva boluntario di DCNA i un sekretariado profeshonal durante su tempu na DCNA pa asina konstruí huntu un mekanismo úniko di kooperashon entre e islanan, pa sostené maneho di parkenan i konservashon di naturalesa den Karibe”, Van der Wal a bisa. “E parkenan i miembronan di direktiva di DCNA ta gradesido ku Tadzio a aseptá e reto aki i ta spera ku su eksperensia i konosementu lo sigui benefisiá konservashon di naturalesa den Karibe Ulandes”, Van der Wal a sigui splika. Struktura i modelo di maneho di DCNA ta pasando den un trayekto di modernisashon sumamente nesesario aktualmente. E proseso aki ta bastante fundamental i ademas diseñá pa mehorá DCNA su nivel di servisio na e organisashonnan ku ta manehá e seis parkenan den Karibe Ulandes. DCNA ta deseá na garantisá su disponibilidat pa atendé di forma konhunto e retonan kresiente relashoná ku konservashon di naturalesa i kambio di klima den region. Alabes DCNA ke intensifiká kooperashon ku vários aktor i partner na Ulanda, den Karibe i internashonalmente. E rekursonan biológiko ekstenso ta e base pa un di e prinsipal fuentenan di entrada di e islanan: turismo di naturalesa. DCNA no ta enfoká solamente riba maneho duradero di áreanan ya kaba protehá, pero tambe riba alsa e nivel di konsientisashon i konosementu di e balor di naturalesa. DCNA ta un NGO ku a keda lantá pa asistí e parkenan nashonal di e islanan di Karibe Ulandes. E organisashonnan aki ta: Parke Nacional Arikok na Aruba, STINAPA na Boneiru, Carmabi na Kòrsou, Saba Conservation Foundation na Saba, STENAPA na Sint Eustatius i St. Maarten Nature Foundation na Sint Maarten. E ofisina prinsipal di DCNA ta situá na Boneiru. DCNA su mishon ta: salbaguardiá biodiversidat i promové maneho duradero di rekursonan natural di e islanan di Karibe Ulandes, tantu riba tera komo den awa, na bienestar di generashonnan di awor i di futuro, dor di sostené i asistí e parkenan nashonal i aktividatnan dirigí riba konservashon di naturalesa den Karibe Ulandes. DCNA ta finansiá pa Nationale Postcode Loterij na Ulanda i Prensès Beatrix ta un di e spònsernan di DCNA. Bervoets tabata na Boneiru pa presensiá e momentu ku Minister di Agrikultura, Naturalesa i Kalidat di Kuminda di Ulanda, señora Carola Schouten, a habri e ofisina nobo di DCNA na Boneiru, huntu ku Gezaghebber di Boneiru, señor Edison Rijna.

Share This
error: Content is protected !!