E ekipo di Vespo RedStars, ayera o sea djadumingu último 15 di sèptèmber 2019, a titulá kampion invikto kategoria U8 di e torneo di futbòl hubenil “FutureCup 2019” na Kòrsou.
Na e torneo aki a partisipá ekiponan di Aruba, Boneiru i Kòrsou.
RedStars a gana tur su weganan di e torneo regular i den final ta gana di e ekipo Stallions ku skor di 4-1 i titulá kampion invikto.
Den e torneo regular tambe RedStars a gana di Stallions ku skor di 2-0.
Outornan di e golnan den e partido final ta Ghelo ku a hinka 2 gol, Jandrick i Jayden a hinka 1 gol kada unu pa duna nan ekipo di Vespo RedStars e título di kampion 2019 di e torneo “FutureCup” na Kòrsou.
Bon trabou di e “coach” nan Rainiger “Payo” Goeloe i Ady Phelipa ku huntu ku e tim a sa di duna tur loke nan tabata por, hungando tremendo futbòl pa titulá kampion invikto.
E delegashon di Vespo RedStars a regresá Boneiru djadumingu den dos buelo den oranan di atardi i anochi.
Pabien na Vespo RedStars ku a titulá kampion invikto di e torneo aki aya na Kòrsou djadumingu último.
Pabien Boneiru.
