KRALENDIJK – Un kantidat di persona a presentá den sala di Korte Henk Welvaart pa sigui desaroyo di e kaso di atrako ku a tuma lugá 20 di mei 2019 na entrada di Van Den Tweel Supermarket. 4 sospechoso a presentá dilanti hues awe, i tabata tin 2 abogado den sala na Boneiru, E. Winkel i Marga van Lieshout, i abogado Royer na Kòrsou, kende a sigui e kaso pa medio di konferensia di video.
Fiskal Bote ter Steege a menshoná e akusashonnan ku tin riba e sospechosonan.

Steven M. 3 akusashon: atrako arma, den posishon di arma, i den posishon di arma durante atrako.

Mozart S. 2 akusashon: a forma parti di e atrako i tabata den posishon arma di kandela.

Angelo D. 2 akusashon: A forma parti di e atrako, posishon di arma di kandela,

i algun akusashon pa Withley S., pa labamentu di plaka i posishon di arma di kandela i algu mas, un total di 3 akusashon.

Hues Edelenbos a menshoná ku e atrako a tuma lugá pafó, nèt dilanti Van den Tweel Supermarket. Falta algun rekisito mas pa loke ta trata e investigashon pa e kaso di atrako, hues a bisa. Abogado Royer sintá na Kòrsou a pidi si por laga su kliente Angelo D. den libertat. E abogado, pa medio di konferensia di video a menshoná tur e motibunan pa por laga su kliente den libertat. Fiskal Bote ter Steege a bisa ta trata di un kaso serio i no por laga Angelo den libertat. “E mester a pensa promé ku a aktua, kiko ta e konsekuensianan. Bo ta sintibo menasá den prison, i bo mester denunsiá na prison, i nan ta tuma medida loke mester sosodé, ”fiskal a menshoná.
Angelo a bisa ku el a deklará na ‘Consepsion’ di loke a sosodé den prison. “Otro kos, mi señora ta un dama di Venezuela i ta difísil pa e so move, pasobra e no konosé Boneiru bon.”
Hues Edelenbos: ”Si nan ta menasábo esei ta nifiká ku ta trata di algu grandi loke a sosodé. E atrako di e sèn di e supermarket, 83 mil dòler ta serio, mas di loke bo abogado ta menshoná pa por lagabo den libertat. E kos aki tabatin impakto grandi riba e komunidat. Ta trata di algu serio. E asuntu di bo famia ta importante, sinembargo no mas di loke a sosodé. Bo por a pensa promé ku bo a kometé e atrako. Pues mi no ta lagabo den libertat, ”hues a finalisá tratamentu di e kaso den pro forma.

17 di òktober ta kontinuá ku tratamentu di e kaso den su profundidat.

 

Share This
error: Content is protected !!