KRALENDIJK – Akusado Paul C. A presentá awe mainta den sala di korte pa responsabilisá loke ta akus’é. Ta trata di un kaso fastioso, unda Paul a laga un dama di FKPD mishi kuné, pa satisfasé seksualmente.

Hues G. Edelenbos a bisa ku testigunan a deklará kontra Paul, i Paul no ta di akuerdo ku e deklarashon. “Janga a deklará ku el a mira den bùs ku e dama tabata sintá banda di bo i bo a bise tene duru, tene duru. Esaki miéntras e dama tabatin su man hinka den karson di Paul. Na FKPD tin hopi hende desabilitá, sinembargo na mente nan ta stabil. A deklará na polis ku e dama a bai sinta dilanti riba petishon di Paul. Di parti di Angerela no tin pèrmit pa sinta dilanti den niun bus di FKPD. Bo a baha bo zip i a pone man di e dama riba bo órgano seksual, i a bis’é pa e tene duru. 2 hende a mira i a deklará loke a sosodé, ”hues a menshoná. “Mi a lesa ku tabata bon kla pa no ta muchu serka di e dama. A papia diferente bes ku Paul riba esaki pa e ta bon na altura di e situashon. A pidi pa momentu ku bo kumindá e damanan di FKPD, djis duna man i no brasa nan,” hues a bisa. El a puntra Paul dikon nèt e dama ei a sinta banda di bo den e bùs? Paul a kontesta: ”Semper e dama ta sinta pega ku ami. Mi no ta mira nada malu ku nos ta banda di otro. Nan no ta mishi ni molestiá niun hende. 5 aña nan a sinta e mes kaminda dikon awor diripiente e kos no ta korekto? No ta henter dia e hendenan ta den bùs. Solamente un momentu di un sitio pa otro. Mi ta sintimi malu ku mi ta dilanti hues den korte awe. Mi no a ferwagt ku e kos ta yega asina leu. Ta mi sèn mi a bai atendé pa kobra, pasobra nan a kitami inhustamente. Momentu ku mi a bai abogado tokante e asuntu ku nan a kitami di trabou, a presentá e asuntu di mishi ku e dama di FKPD. Si e kos tabata asina kastigabel, dikon nan no a inisiá e kaso for di prinsipio?”, akusado a menshoná.

Hues a konta ku Janga tabatin hopi difikultat pa a konta loke a sosodé den bùs. Akusado Paul a sigui konta:” Mi tabata na altura ku no por sinta banda di e dama. E motibu pasobra e tabata seksualmente inkontrolabel, esei si mi no tabata sa. Nunka nan a bisami esei. Nan a bisa e muchanan ta mala mucha i no por sinta banda di nan. No a menshoná nunka algu tokante sèks. Loke a keda deklará no ta asina den práktika. E forma ku mi ta bisti no ta posibel p’ami habri zip manera nan ta bisa. E kos no ta posibel. Tur hende na FKPD sa ku no por mishi ku e muchanan. Tur hende ta yega serka i duna man saludá nan. Nada otro,”akusado a konta.  

Fiskal J. Blanco a trese su rekisitorio i a bisa ku Paul a kue man di e dama i pone riba su órgano seksual i bisé tené duru. Bo no ta rekonosé loke a sosodé. Bo tabata sa bon ku mester a tene distansia for di e dama. E dos deklarashonnan ta indiká bon kla ku bo a hasi loke a sosodé. Bo karchi penal ta limpi i ta tene kuenta kuné. E dama ta dependé di abo. E dama a sinta banda di bo riba bo petishon. Loke a sosodé a pasa konsientemente. Mi ta tumabo na malu tokante e kaso i ta pidi un kastigu di 6 luna di prison, teniendo kuenta loke ya bo a sinta den prison mi ta hasié 170 dia di prison,”fiskal J. Blanco a terminá bisando.  

Abogado E. Winkel a defendé su kliente i a bisa entre otro ku loke a deklará no ta kuadra. “El a pidi e dama sinta den bùs pega kuné, sin niun mal intenshon. E espasio ku tin pa sinta no ta posibel pa hinka man den karson di otro. Mi kliente ta un persona di 61 aña i e mes ta bisa di no ta reakshoná asina rápido. Pues loke a sosodé ta kasi imposibel den su kaso. Tin hopi posibilidat si di bèrdat e tabata deseá pa hasi algu ku e dama seksualmente. Na FKPD e por a hasié trankil sin tuma riesgo den e bùs, kaminda tabatin mas hende. Mi ta pidi hues pa laga mi kliente liber di e akusashon,” abogado Winkel a bisa den su defensa pa e kliente.

Último palabra di e akusado tabata: ”Mi no ta haña e kos hustu. E loke a deklará no ta bèrdat!”

Hues Edelenbos a finalisá bisando: ”E kos ta kastigabel. E deklarashon p’ami ta korekto. Mi no ta mira òf sinti ku e deklarashonnan ta mentiroso. Na polis e dama a konta tur kos. No tabatin sèks, sinembargo si loke a sosodé den bùs, ku man di e dama den karson di Paul.

6 luna kastigu di prison kondishonal i un temporada di prueba di 3 aña, 180 ora di trabou pa komunidat. No mester bai prison, ”hues a sera e kaso bisando. 

Share This
error: Content is protected !!