Edukashon i enseñansa di un mucha ta un tarea konhunto entre mayor i dosentenan. E bon relashon entre mayor i dosentenan lo yuda e yunan siña miho. Alabes nan lo sinti nan mas motivá i sigur di nan mes.

Djasabra último ‘Opstap Opnieuw’ tabatin e tayer titulá ‘Skol i Famia’. E aktividat a tuma lugá na Sentro pa Hubentut i Famia na Playa di 9’or pa 12’or.

Famianan ku ta partisipá den e programa ‘Opstapje’ i ‘Opstap’ por a kompartí i disfrutá huntu di e diferente aktividatnan ku a ser ofresé.

‘Muchanan ku ta bai skol nan mundu ta krese enormemente. E ta hopi importante pa muchanan haña un guia positivo i motivashon di mayornan na kas i dosentenan na skol. Esaki lo yuda  muchanan desaroyánan idioma,  abilidat pa siña i pensa, fortalesé nan motóriko fini i gròf, i desaroyánan área soshal emoshonal.’

Asin’aki Yùfrou Zulaika di Skol Amplio Papa Cornes, a kompartí informashon i tepnan balioso pa stimulá desaroyo di e yu. Alabes el a  enkurashá mayornan pa keda tene kontakto ku skol regularmente. 

Durante e mainta, mayornan i yu por a kompartí i krea obranan di man huntu ku lo yuda e yu mantene struktura na kas, rekonosé kolo, forma, sifranan. Asin’aki, mayornan por a pone na práktika e tepnan ku nan a haña durante e charla.

Sentro Hubentut i Famia i su programa Opstapje/Opstap ta gradisí un i tur ku a partisipá durante e tayer. Alabes ta felisitá e muchanan ku a kaba Opstap Opnieuw ku éksito.

Opstap Opnieuw ta un proyekto di Sentro pa Hubentut i Famia.  E proyekto ta kai bou di guia di mamanan di bario, Jovianca Martis, Lu-Ann Engelhart i Arelis Goeloe,  ku semanalmente ta hiba e tareanan pa mayor na kas.  Mayornan na nan turno ta hasi e tarea ku nan yu (4 te 6 aña) tur dia pa mas o ménos 15 minüt. Asina mayornan por pasa tur dia ratunan plasentero i sigui desaroyo di nan yu djaserka. Señora Carla Oleana,trahadó Pedagógiko di e Sentro, ta kordiná e programanan Opstapje i Opstap.

Pa mas informashon, por tuma kontakto na telefòn 7157200 òf bishita nos Facebook page Shif Bonaire i Derecho di Mucha Bonaire.

Share This
error: Content is protected !!