Djabièrne 20 di sèptèmber 2019 ta e dia nashonal pa lidernan di krèsh, kual awendia nos ta yama trahado pedagógiko.
Na 2010 a dekreta e di 3 djabièrne di sèptèmber komo e dia nashonal pa trahadonan pedagógiko den sentro di akohida pa mucha.
Esaki komo muestra di apresio pa e profeshon trahado pedagógiko, pero tambe konsientisando huntu ku otro riba e tarea importante di eduka, disiplina i progresa.
E tarea prinsipal di e trahado pedagógiko ta pa kontribui na edukashon i formashon di nos chikitinnan kual ta nos futuro di mañan. Pero tambe hasi posibel ku mayornan por traha.
Na e momentu nan aki nos tin na Boneiru mas ku 40 sentro di akohida pa mucha di 0 pa 12 aña i mas ku 170 trahado pedagógiko.
Pa e selebrashon aki, Sentro Hubentut i Famia ta organisa un aktividat spesial pa tur trahado pedagogiko.
Komo invitado spesial lo bai tey sr Giovanni Eugenio (sigologiko laboral) for di Korsou kual lo bai hiba un kombersashon motivante tokante di forsa pa sobrebibi.
For di algun tempu kaba nos ta mirando diferente desaroyo pa loke ta trata akohida pa mucha. Gobièrnu den estrecho koperashon ku Sentro pa Hubentut i Famia, ministerio hulandes i huntu ku e sentronan di akohida pa mucha ta trahando riba mehorashon di kalidat, pa asina por ofrese nos muchanan di Boneiru un akohida ku ta sigur, pagabel i ku ta kontribui na bon desaroyo i formashon general di e mucha. Alabes e mehorashon di kalidat ta dirigi riba un miho traspaso di sentro pre-eskolar pa skol basiko, i pa por señala kaminda tin ku yuda e mucha mas trempan.
Skohendo e trabou komo trahado pedagógiko ta un vokashon ku bo ta eherse ku amor, pasenshi i dedikahon pa e mucha. Apesar di tur e luchanan, kontratiempo i eksigensianan nobo, tòg nos trahadonan pedagógiko a mustra di ta dedika i a persevera dunando tur ku tin pa por ofrese akohida pa nos chikitinnan.

Nos ke felisita tur nos trahadonan pedagógiko i tambe gradisi nan ku nan pashon, amor i dedikashon na nos muchanan. Sigi ku e bon trabou !

Na nòmber di Sentro Hubentut i Famia.

Share This
error: Content is protected !!