KRALENDIJK – Leopold M. a presentá den sala di korte ayera tardi algun minüt promé ku 5‘or. E ta akusá di ta kómplise relashoná ku e atrako na Van Den Tweel Supermarket, kaminda a bai ku 83 mil dòler. E atrako a tuma lugá dia 20 di mei 2019, unda algun persona a kita sèn for di esnan ku a bai rekohé benta di dia di e supermarket. E atrakadónan a atraká e personal di Delta Security, kita e sèn i kore bai. Ayera mainta a presentá e sospechosonan dilanti hues den pro forma, i atardi a trese Leopold M. apartá for di e otronan. Fiskal Bote ter Steege: ”Bo ta forma parti di e loke a sosodé.”

Hues a bisa ku mainta a papia ku e 4 sospechosonan di e kaso, i investigashon ta kla pa trata e kaso den profundidat dia 17 di òktober.

”Abogado Larmonie di Leopold a bisa: ”Investigashon ta kla. Nos tin algun pregunta pa Martines di Delta Security. Esaki relashoná ku e prosedura di kon ta atendé ku transporte di sèn. Si esaki tabata posibel pa mi kliente a duna informashon pa por a tira atrako, ”e abogado a bisa. Hues a bisa abogado: ”Bo kliente mes a konta kiko i kon tur kos a sosodé riba e dia.”

Abogado Larmonie a bisa ku su kliente no por a informá e atrakadónan e dia i ora ku ta bai rekohé sèn. Esei ta loke nos ke puntra pa tende si ta bèrdat mi kliente tabata sa pa por a informá e hendenan e momentu pa nan atraka esun ku a bai rekohé sèn.  

Hues a repasá algun deklarashon di Leopold unda ta menshoná ku riba tur djaluna ta rekohé sèn na Van den Tweel Supermarket.   

Fiskal Bote ter Steege a menshoná ku e no ta mira e nesesidat pa atendé ku reclasering promé ku tratamentu di e kaso. Hues ta tuma desishon, sinembargo ami no ta mira ku Leopold mester di yudansa di reclasering pa atendé e kaso. Mi no ta mira niun motibu pa pone Martines komo testigu den e kaso, ”fiskal a menshoná.

Hues a bisa ku ta fèrfelu pa atendé ku reclasering. “No tin nada ku ta indiká ku bo mes no por papia dia ku ta trata e kaso. Un rapòrt di reclasering no ta nesesario.”

Leopold: ”Motibu ku mi ke pa Martines òf e direktor di e kompania ta testigu, pa nan splika kon e asuntu di esnan ku ta rekohé sèn ta funshoná. Mi tabatin kombersashon ku Angelo i a bis’é ku Delta Security a desaroyá mihó ku ‘Bonaire Security’. Angelo a bisa na reshèrshe ku mi a dun’é mas informashon i esei no ta bèrdat. Mi no ta traha patruya pa hopi tempu. Úniko hende ku por splika kon e situashon ta funshoná pa loke ta trata patruyamentu, ta e mènedjer òf e doño di e kompania di seguridat, “Leopold a konta.  

Hues a bis’é ku no tin niun motibu pa pone otro testigu den e kaso. “Dia 17 di òktober boso tur ta huntu den sala di korte pa tratamentu di e kaso den su profundidat.”  

Share This
error: Content is protected !!