E situashon ta di atenshon, despues ku Merka a pone diferente sankshon riba PDVSA ku ta doño di Bopec aki na Boneiru.

Curoil ta kumpra e fuel ku Contourglobal ta usa pa pródusi koriente pa e isla di Boneiru, serka Bopec ku ta kai bòu di PDVSA.

Na e momentunan aki tin un lisensia ku a keda akordá entre Merka i Hulanda tokante kon e pago mester tuma lugá.
E lisensia aki ta bálido te ku 31 di mart 2020.
Den dje tin pará ku pa Bopec por bende fuel ku Curoil, e pago di e benta mester tuma lugá riba un kuenta speshal ku ta keda akordá, ya asina por tin kòntròl riba e pagonan ku ta wòrdu hasi na Bopec.

Relashoná ku esaki, ya tin algun dia ta bai ku e dokumento aki ta kla, pero gerensha di PDVSA a prohibi maneho di Bopec pa firma esaki.
Tin diferente reunion a tuma lugá kaba aki na Boneiru relashoná ku esaki.

Awe mèrdia tabata tin otro reunion ku karakter di urgensha yamá pa Gezaghèber Edison Rijna entre otro ku Curoil i Bopec.
Curoil no tabata tin problema pa a firma e dokumento, pero di parti Bopec si niun hende a firma, ya ku di parti di gerensha di PDVSA a prohibi nan pa firma e dokumento aki.

Informashon ku nos ta disponé di dje ta indiká ku tin un ‘deadline’ riba mesa te ku mayan pa Bopec firma e akuerdo aki.
Si esei no sosodé, no ta keda Gezaghèber mas opshon ku bini ku un “Nood Bevel” kaminda ta obligá e kompania Bopec pa entregá fuel na Curoil i nan lo paga esaki riba e kuenta akordá, pa asina Boneiru no hañe den problema ku suministro di koriente mirando ku no tin fuel pa Contourglobal.

Nos ta siguiendo e desaroyo aki mashá djaserka mirando ku tin un silensio hermetikó pa ku e situashon ku a presentá aki.

Tanten ku tin diferente sankshon kontra Venezuela i PDVSA, nos lo por keda haña nos den e tipo di problema nan aki.

E situashon di Bopec mes ta birando mas peligroso, mirando ku manera kosnan ta bayendo, lo por ta asina ku lo no tin sèn mas pa paga salario di trahadonan.


FUENTE: AIMED AYUBI.

NOTISIA KU BO POR KONFIA.

Share This
error: Content is protected !!