KRALENDIJK – Boneiru a pèrdè un persona hopi balioso kende a hasi hopi pa e isla di Boneiru, komo arkitekto, divisor di konstrukshon pa entre otro gobièrnu.

Norman ta bon konosí. Palu Djo of Palito ta e forma ku e ta ekspresá yamando kualke persona den komunidat, ku a bira un kek. No ta su beinam, sino e manera ku e ta yama mayoria hende i nan ta kontest’é loke e yama nan. Palu Djo òf Palito ta kisas mas kustumbrá.

Periodista di LiveFM; Fittipaldi Pietersz konosé Palito hopi aña. “Mi tabata traha den konstrukshon momentu mi a kaba skol i Palu Djo tabata kontrolá pa gobièrnu si e trabou ta korekto. El a presentá serka nos e tempu aya den bario republiek i tabatin un persona yu di Kòrsou ku tabata traha huntu ku nos. Semper nos a yam’é ‘Kòrsou’, i su nòmber mes ta Richmar. Palu Djo a hasi su tarea i na final semper e tin algu prèt pa bisa. El a bisa Kòrsou, wak pa bo no bai kana keiru riba waf. Kòrsou a puntr’é sorprendí, dikon. Palu Djo a kontesta, Si bo bai kana i kai na awa, bo no ta keda riba awa. Bo tin muchu oro na bo kurpa. Nos a hari un mundu. Bèrdat Kòrsou tabata yen di oro na su kurpa, Pietersz a konta. “Skirbiendo mi mester a hari un bia mas.” 

Palito of Palu Djo

Un persona hopi konosí den komunidat, amabel i gusta kombersá, sabí i korekto. Tur kos momentu e ta kontrolá riba trabou, e ta eksihí pa kosnan ta korekto pa por kontinuá. Asina mi konosé i tur hende tabatin rèspèt pe. Hopi kaminda mi ta tende nan komentá, mester traha korekto, pasobra si Palu Djo yega e kos no ta bon, e ta stòp e trabou. E no tabata un persona ferfelu. Si algu no ta bon e ta konsehábo kon pa drech’é, ”Pietersz a konta. “Ami a sera amistat ku Palu Djo of Palito den e mundu di paseo ku motosaikel organisá pa Orlando ‘Lando’ Francisca. Nan ta bon amigu i hopi aña Palito tabata hopi serka di Lando relashoná ku e paseo di motosaikel. El a kore hopi aña ku su Harley Davidson kolo blou. Di e forma aya nos tabata topa na hopi okashon, i despues den mi trabou komo prensa. Un persona semper alegre i sosial ku tur hende. Manera Pader Alphonsus Baak a menshoná durante Santu Sakrifisio di misa fin di siman, Norman a drumi trankil na kas, sin prekupashon i sera wowo. Forsa na famia spesialmente su yu ‘Boeli’, kende semper nan tabata huntu. Awor for di den shelu e lo manda bendishon pa e yu i kompañ’é spiritualmente,” Pietersz a finalisá ku hopi emoshon skirbiendo. Entiero ta tuma lugá fin di siman na parokia San Bernardo na Playa.

Riba potrèt Palu Djo ku su Harley Davidson durante Paseo ku motosaikel ‘Dia di Boneiru 2011’.

Share This
error: Content is protected !!