KRALENDIJK – Relashoná ku e akshon di limpiesa ku Selibon N.V a organisá djasabra último den kuadro di ‘World Cleanup Day’, Radio Live 99.9 FM a tuma kontakto ku Shanelca Martha, kordinadó di komunikashon di Selibon N.V.. El a konta ku nan ta kontentu kon tur kos a kana riba e dia. “E ‘World Cleanup Day’ a bai hopi bon. Nos a pone alrededor di 15 baki grandi di shushi den diferente bario riba e isla. E forma ku kosnan a bai e aña aki, kompará ku añanan anterior, a duna bon resultado. Nos a organis’é diferente, ku e meta pa hasi e hende konsiente, “laga nan mes bin i tira e shushi den e baki den bo bario”. Asina stimulá e hende pa e depositá sushi konsientemente. Entre otro nos a tuma nota ku a trese diferente shushi manera bòter di glas, aparatonan elektróniko, kashi, kama, sakunan di plèstik yená, mata i diferente otro shushi di kas. Ta notabel ku e hende ta birando mas konsiente pa separá shushi. For di e 6 bario ku nos a pone baki di shushi, tambe Lac Cai, sin konta Playa Frans, a suma un kantidat di 38560 kilo. E Bario ku a rekohé mas tantu shushi ta Nort di Saliña ku 11380 kilo di shushi. Bario Nikiboko tabatin 10130 kilo di sushi. Antriol ta e bario ku menos shushi a keda depositá.  “E aña aki a konsentrá riba 6 bario di mas grandi di Boneiru, i den e siguiente lunanan nos lo kontinuá ku baki pa otro bario, den esnan mas chikitu, kaminda nan tambe por depositá nan shushi. Nos di Selibon ta hopi kontentu kon tur kos a bai i ta sigui ku e trabou pa pasa den tur área posibel i duna oportunidat pa depositá shushi,”Martha a menshoná.    

Share This
error: Content is protected !!