KRALENDIJK – 19 aña tras di otro ‘Jong Bonaire’ ta organisá e aktividat di landa pa Klein Bonaire. Awor mas grandi, mas impaktante. Manera ta un tradishon ‘Jong Bonaire’ tur aña ta organisá e famoso evento “Swim to klein Bonaire”, ku ta tuma lugá djadumingu 6 di òktober 2019 pa 9’or di mainta. Riba e mes fecha 6 di òktober, for di 7’or di mainta por inskribí pa partisipá. E aktividat sosial i deportivo ta kuminsá 9’or di mainta, i ta fungi ku e meta pa trese famia, konosínan tambe e turista huntu. Di e forma aki ta kontribuí na yudansa pa e sentro pa hóben “Jong Bonaire”. ‘Jong Bonaire’ ta un di e diferente organisashon na Bonaire, mas grandi pa desaroyo di hóben den Karibe. Mas ku 150 hóben studiante di SGB, skol sekundario na Boneiru ta miembro di ‘Jong Bonaire’. E ‘Swim to klein Bonaire’ ta un di e aktividatnan ku ta generá mas entrada pa ‘Jong Bonaire’ durante aña.

Manera ta kustumber e aktividat ta tuma lugá na ‘Spice Beach Club & Eden Beach Resorts’, esta e salida. Oportunidat pa inskribí ta djasabra 6 di òktober for di 16:00/19:00 na Jong Bonaire, Kaya Libertador Simon Bolivar 16. Tel: 717-4303. Djasabra ta entrega tíshùrt i djadumingu e number pa partisipá na e landamentu. Pa esnan ku no por ta presente djasabra, por inskribí djadumingu mainta entre 7:00 pa 8:45 na Eden Beach.

Karchi pa e ‘fundraising’ ta kosta di $15,- pa adulto i pa mucha bou di 12 aña $10,-. Botonan ku lo ta presente pa yuda den e parti di seguridat ku nan boluntarionan ta entre otro Stinapa, Coast guard i Woodwind.

Jong Bonaire ta gradisí tur su spònsernan ku ta yuda pa hasi e evento grandi aki posibel.

Nos ta spera un grupo di partisipante mas grandi ku anterior. Aña pasá tabata tin un kantidat di 480 partisipante i sigur tin sufisiente espasio pa mas partisipante. Jong Bonaire “Swim to klein Bonaire” ta “kick off” e selebrashon di “Bonaire international Sailing Regatta”, Ku ta di 8 pa 12 di òktober 2019.

Share This
error: Content is protected !!