BONEIRU A PÈRDÈ UN SINDIKALISTA FUERTE!

Written by on

KRALENDIJK – Nilco Rollan no tei mas, loke a sorprendé hopi hende den komunidat. Rollan a hasi hopi pa trahadónan na Boneiru komo sindikalista.

E ta presidente di sindikato A.F.B.W., Ko-fundador i visepresidente di USIBO, Miembro di Komishon di Retiro i Miembro di eks SER di eks Antia Ulandes.

Fittipaldi Pietersz di Radio Live 99.9 FM a konta ku el a konosé Rollan na aña 2002. “Momentu ku ami a kuminsá traha na Radio Nederland, mi a topa Rollan, i asina nos tabata kolega i e presidente di A.F.W.B. Pues e tabatin 2 tarea na ‘Radio Nederland Wereld Omroep’. E tabata hasi su trabou i lucha pa derecho di nos komo su kolega. Rollan ta un persona serio, fuerte i kla pa pone òrdu un bes kaminda ta rekerí. Nos a traha komo kolega algun aña i despues el a bai ku penshun. Huntu kuné, un di su yunan ‘Juni’, tabata mi kolega. Nos a traha huntu den mes departamentu yama ‘Continuity’. Un persona ku ami a eksperensia ku semper ta kla pa yuda i tin bon konosementu di ‘IT’,”Pietersz a konta. El a sigui papia tokante Rollan:”El a bai ku penshun i nos no tabata topa hopi. Momentu ku mester atendé sierto kosnan di trabou e ta presente,”Pietersz a konta. El a sigui bisa: ”2013 despues ku RNWO a sera porta, ami a kuminsá traha den prensa. Mi a topa Rollan, den un otro posishon. Ami miembro di prensa i e presidente di A.F.B.W.”

Pietersz a sigui konta:”Win de Grijze algun aña pasa a konta mi ku Rollan tabata un di e promé nan huntu kuné, ku a kuminsá ku pustamentu òf tèstmentu di outo riba kaya ku e meta pa bai pusta na Kòrsou den Dragrace. Rollan tabata trein ku outo na altura di kura di L.V.V. Kaminda di bai Lagun. Si mi no ta kiboká ta trata di den añanan 70 pa 80 esaki tabata tuma lugá, ”Pietersz a menshoná. 

Tino de Palm di Radio Live99 a konta ku e tabata topa Rollan na momentu ku trahadónan di kualke kompania disidí ku nan no ta di akuerdo ku kondishon nan di trabòu i ta pone trabòu abòu. “Boneiru a pèrdè un gran lider sindikal i luchadó”. Komo parti di Union Sindikato Boneriano (USIBO) sèmper e tabata presente na kualke Akshon pa sostené su koleganan di sindikato. “E no gusta papia den prensa te ora bisé, Nilco bo tin ku papia algu,”de Palm a konta. Na final di entrevista sèmper nos ta “shake hand” i su palabranan ta;” Dal bai ku e bon trabòu Tino i sigui ta skèrpi”

“Rollan a bai laga nos di un forma inesperá, loke a laga esnan ku a keda tras ku e pregunta dikon, kiko a sosodé?”

Di parti di e tim kompletu di Radio Live 99.9 FM, nos ta deseá hopi forsa na famia. Dios kompaña nan durante e dianan difísil.

Seremonia di despedida ta tuma lugá na komienso di e siman aki.

Riba potrèt Nilco Rollan, presidente di A.F.B.W., den un entrevista ku kolega Tino de Palm na aña 2018 durante un wèlga di trahadónan di Fundashon Mariadal i despues durante un rueda di prensa. Siguiente potrèt ta na luna di desèmber 2017, kaminda a yega na areglo na benefisio di e trahadó di e kompania BWM. E otro potrèt ta momentu ku Lidernan sindikal a uni i mustra ku nan tambe ta sostené e lucha i derecho ku Fundashon “Nos Ke Boneiru Bek” tabata manifestá, e tempu aya, (2014) na porta di ofisina di BC.


Share This

Current track

Title

Artist

error: Content is protected !!