Fayesimentu di Nilco Rollan

Den un forma inesperá kompañero Nilco Rollan a bandoná e bida terenal dia 25 di sèptèmber último. Ku fayesimentu di Nilco Rollan mundo sindikal a sufri un pèrdida grandi, sigur ku awor sindikalismo komo bos di e klase trahadó i esnan marginá a haña rekonosimentu i rèspèt komo partner igual den e tripartit di Diálogó Sentral. I netamente awor ku e diskushon tokante minimo sosial pa esnan sin trabou i sueldo minimo pa esnan ku trabou ta den plena diskushon. Su eksperensha di 28 aña komo miembro di komishon di retiro, su amplio konosemento i eksperensha ku ela atkerí komo presidente di AFBW i vise-presidente di USIBO lo hasi falta na momento di fiha posishon. E manera determiná ku ela duna kontenido na e diálogo na momento di negoshá CAO a demonstrá ku su sindikato no a entregá nada di e militansia sindikal, sino a opta pa e díálogo pa solushoná problemanan laboral, pero tambe pa mehorá kondishonnan tantu primario komo sekundario di e klase trahadó. Su deseo pa organisá e klase mas tantu posibel a duna fruta ora ela logra amplia AFBW su representashon sindikal organisando trahadónan di Fundashon Cas Boneriano i tambe e trahadónan di Bonaire Wegen Maatschappij i firma nan promé kontrakto kolektivo. Su determinashon pa duna rekonosemento i rèspèt na e trahadónan den kuido mester a keda reforsá ku e último arma sindikal ku ta akshon, pero ku despues di un aña di negosashon intenso a duna resultado positivo\, Kaminda den promé instansha no tabatin ningun adelanto pa e trahadó den uido a terminá ku diferente logronan positivo i un CAO nobo.. Aki su lema ku semper ela usa a duna resultado, esta “ SOLO EL EKIPO GANA”.

Hopi tabata e deseo di Nilco pa a mira relevo den liderato sindikal dor di hóbennan. Un kondishon ela pone pa esaki. Pa ser sindikalista semper kòrda ku bo ta hasié pa otro i no pa bo mes. Pa tal rason tambe su deseo ta pa en bes di gasta sèn na krans pa su entiero hasi un donashon riba kuenta number 8400000900032978 na fabor di Algemene Federatie van Bonaireaanse Werknemers na RBC. E donashonnan risibí lo keda eksklusivamente registrá i uzá komo un kontribushon pa forma lidernan sindikal nobo aki na Boneiru.

Dia 25 sèptèmber a sosodé loke tabatin ku sosodé. Esaki ta palabranan ku semper ela uza ora duné kualkier notisia sea agradabel o no agradabel. Nos niun ta indespensabel den e bida aki. Nos ta na mundo pa kumpli ku un mishon. Ku morto e mishon ei tambe ta terminá. E ekipo sindikal a pèrdè un wowo den e kadena, pero manera semper lo sera e kadena bèk.

Rei morto, rey puesto. Ya tramitenan a keda hasí pa mas pronto posibel miembronan di e sindikato AFBW bin huntu den un kongreso statutario pa skohe un presidente nobo pa e sindikato. Den esaki e defunto semper a deseá pa delegadonan hasi nan máksimo esfuerso pa organisa 99% di e trahadónan na e kompanianan na unda AFBW tin representashon. P’esei un yamada na e shopstewardnan di Fundashon Mariadal, Salt Company, Fundashon Cas Boneriano i Bonaireaanse Wegen Maatschappij, ban trata na kumpli ku e deseo di boso presidente i hasi AFBW e sindikato fuerte ku semper e tabata bou di Nilco Rollan.

A resta nos pa hasi un yamada na e klase trahadó en general, i esnan miembro di AFBW en partikular, pero tambe na tur amigu i konosínan pa kompañá e famianan di Nilco awe tardi entre 13.00(1’or) i 15.00{3’or) na Kasa Mortuorio Nos Konsuelo. Un petishon ta bai pa esnan di Fundashon Maria Dal, BWM, Salt Company i Fundashon Cas Boneriano, pa si ta posibel bin uniformá.

Nilco, kompañero, papito manera bo ta yama nos, te despues, nos lo hasi tur loke ta na nos alkanse pa tene bo memoia na haltu. E chapi di lucha ku bo a tira abou 25 di sèptèmber último, nos lo rekohé i sigui chapi i plug pa logra mihó bienestar i kalidat di bida pa e klase trahadó i su famia i pa henter pueblo di Boneiru.

Nilco Rollan

4 di yüli 1941 pa 25 di sèptèmber 2019.

Presidente di AFBW

Ko-fundador i visepresidente di USIBO

Miembro di Komishon di Retiro.

Miembro di eks SER di eks Antia Ulandes

Ganadó di Chapi di Lucha.

Boneiru, 30 di sèptèmber 2019

Na nòmber di USIBO

Norwin Willem, sekretario enkargá ku Boletin Informativo.

Share This
error: Content is protected !!