“CITY SHOP NO POR KONTINUÁ KU KRÉDITO PA KLIENTE”

Written by on

KRALENDIJK – Amouddi Dabboussi doño di ‘City Shop’ a papia ku prensa relashoná ku un situashon ku ta hopi preokupante. Dabboussi no ta kontentu ku e forma kon ta atendé, kaminda na Hulanda por hasi krédito te na un montante di 1000 Euro promé ku mester yena papel pa henter un proseso. “Ántes tabatin e posibilidat unda por a bende kos pa medio di bòn di 10 luna. Despues di 10.10.10. AFM a bisa no por sigui ku esaki. Dabboussi a amplia i a splika den detaye tokante e asuntu loke a sosodé i kon a kontinuá. El a menshoná entre otro kon a stòp di hasi e servisio di kumpra i paga den tèrmino di tempu. Pues tabata duna bòn pa medio di un persona i a stòp esaki i City Shop mes ta atendé dirèkt ku kliente pa krédito. Loke AFM a implementá ta bon ya asina e kliente no ta surpasá loke e ta tuma i no por kumpli ku e pago i hink’é den pèrtá.  Asina nos a kontinuá i AFM a sigui pèrsigui nos,” Dabboussi a menshoná. El a sigui bisa:”AFM ta mira nos manera un banko. Dia tras di dia e kos ta bira mas severo. E medidanan ta hopi. Awor nan a bisa si un hende ke kumpra un kama di beibi, si e tin ku paga awor mitar sèn i despues di 1 luna e otro mitar, e mester un kantidat di kos manera slep di salario, mustra si e tin debe i kuantu e ta pagando na e debe i hopi mas. Ta trata di e mes un rekisito ku un persona mester hasi, momentu ku e ta bai kumpra un kas òf un outo via banko. Si e ta deseá pa kumpra un blènder mester hasi e mes un proseso.
Hopi hende ta sali hopi mal kontentu for di mi negoshi. Mi no ta bira lomba pa niun hende. E motibu, ta e regla nobo ku tin i ami no por sigui ku e parti di krédito. For di despues di 10.10.10. ta un loko so a kontinuá ku krédito riba e isla di Boneiru,”Dabboussi a bisa prensa. “Un loko so tin i ta Amouddi. Nos ta hasié pasobra nos stima nos komunidat. Ta nan a ponemi kaminda mi ta awe i mi no ke laga nan na kaya. Un piskadó no tin slep di banko. Hopi hende ta bisa dikon City Shop ta hasi asina difísil? No ta City Shop sino AFM ta hasi e kos difísil. Siman pasa nos a tuma nota di algu ku ta ilustrá ku na Hulanda si un persona por hasi krédito te un montante di 1000 dòler, sin mester laga e kliente yena riba papel un kantidat di pregunta. Na Boneiru esaki no ta posibel. E kos no ta kuadra pa Boneiru. Ta di lamentá, sinembargo mi no por duna mas krédito. Ku tur e reglanan di AFM mi no por kumpli. Niun otro negoshi no ta hasi esaki. Ami so ta loko i ta hasie pa mi hendenan di Boneiru ku mi stima. Nos no ta banko. Banko ta finansiá hopi kos loke ta yuda nan kubri tur gastu. Nan por hasi henter e proseso ku AFM ta eksihí. Niun otro por hasié. Si gobernante nan ke nan por aserkámi i nos por sinta papia tokante e situashon. Mas o ménos 700 persona ta hasi krédito serka nos i ta kumpli ku loke nan ta tuma i paga poko poko manera nan forsa ta permití,”Dabboussi a finalisá bisando.

 
Un empleado di City Shop tambe a dirigí palabra i a menshoná entre otro ku nan a kustumbrá yuda hende pa nan sali fo’i pèrtá. For di despues di 10.10.10. e kos a bira difísil. Awor no por yuda esun ku ménos entrada mas. Ora nos bisa nan di e situashon nobo, nan ta puntra kon ta bai hasi. Ya pa mas di 25 aña nos a hasi esaki. Mester por yega un forma pa kontinuá pa yuda e kliente ku ménos entrada,”e empleado di City Shop a menshoná.

Pa e infome mas detayá por skucha e grabashon den su totalidat riba nos página di ‘facebook’.

Share This

Current track

Title

Artist

error: Content is protected !!