Kralendijk – Resientemente Fundashon Echo a kompletá su di dos dia di reforestashon den e área di Jankòk, serka di saliña di Goto, for di e entrada parti sùit di Parke Washington. E área ta unu ku a keda ekskluí i sera ku waya for di bestianan invasivo pa asina por planta i duna naturalesa un man. E reforestashon di e área, ku a keda plania durante dos dia; 7 di sèptèmber i djadumingu último 22 di sèptèmber, kaminda un grupo di boluntario a bini huntu i duna un man. Dia 7 di sèptèmber a kuminsá ku e promé trabou pa reforestá kaminda a hala waya di e kurá, koba tur buraku i a planta 75 palu. Djadumingu último a planta sobra palunan. E meta tabata pa a planta 1000 mata. E tipo di matanan tabata entre otro Kenepa, Hoba, Shimaruku, Kalabari, Oliba, Kalbas, Guapira Fragrans, Taki, Dividivi/ Watapana, Oliba machu, Kohara, Kibrahacha i Palu di sia. Echo a logra riba e dia pa planta un total di 297 palu di mata huntu ku e  boluntarionan durante dos dia. Durante henter siman muchanan di diferente “Na Schoolse Opvang”, ta sigui  duna un man pa kaba planta sobra matanan. Pa e muchanan esaki ta un atardi informativo kaminda nan ta haña e oportunidat pa siña planta i tambe konosé diferente matanan nativo ku nos tin. Djaluna nos tabatin un grupo di 15 mucha di Kristu Bon Wardadó ku a planta 30 palu di mata. Nos di Echo Foundation ta gradisí tur e boluntario ku a yuda durante e dos dianan ku e preparashon i tambe plantamentu di e mata.

Si ta deseá ainda pa planta ku un grupo òf ku un skol, por fabor tuma kontakto ku nos na info@echobonaire.org òf +599 701 1188.

Share This
error: Content is protected !!