Riba djárason 25 di sèptèmber, a drenta keho di kiebro den un kas situá na La Palma. Entre djamars 24 di sèptèmber pa mas o ménos 9.45’or di mainta i djárason 25 di sèptèmber pa mas o ménos 7.45’or di mainta, deskonosínan a drenta e kas dor di a fòrsa un bentana patras di e kas. A bai ku entre otro un televishon kolo pretu di marka Sceptre i un bòshi di yabi.

Riba djaweps 26 di sèptèmber, alrededor di 9.30’or di mainta, un aksidente entre un outo i un bròmer a tuma lugá riba Kaya Korona. Shofùr di e bròmer tabata keha di doló na su pia.

Riba djaweps 26 di sèptèmber, a drenta keho di maltrato di bestia. Na un kunuku situá na Ser’i Angola, miembronan di e organisashon pa protekshon di bestia, bou di guia di polis, a bin topa ku algun toro i porko sin awa ni kuminda. Tabatin tambe algun porko morto den fase di deskomposishon leu kaba i algun ku tabata morto algun dia, mei mei di e porkonan bibu. Ta investigando e kaso aki.

Riba djabièrnè 27 sèptèmber pa mas o ménos 7’or di anochi, un aksidente entre un outo i un skuter a tuma lugá riba Kaya Korona. E skuter a sali for di un sitio di stashoná outo, miéntras e outo tabata biniendo, ku konsekuensia ku e outo a dal den e skuter. Shofùr di e skuter a keda herida na pia robes i ambulans a transporte pa hòspital pa tratamentu médiko.

Riba djabierne 27 di September, alrededor di 20.30 a detené un hòmber di inisialnan D.S di 43 aña di edat relashoná ku un ‘hit and run’ bòu di influensia di alkohòl na altura di Kaya Seabird. E hòmber a aksidentá promé den un outo i despues kontra un kurá di kas. E hòmber a baha i trata di kore bai laga polis na pia. Despues di un persiguishon kòrtiku, polis a logra detené.

Den oranan di anochi di djabièrnè 27 di sèptèmber, pa mas o ménos 11.15’or, un aksidente entre dos outo a tuma lugá na altura di Sabana Piedra Krus. Un di e outo nan a desviá for di su banda di kaminda ku konsekuensia ku ela dal den e outo ku tabata biniendo for di direkshon kontrali. Shofùr di un di e outonan tabata keha di doló na su pia i e pasahero di e otro outo tabata keha di doló na su pia i den pechu. Ambulans a transportá ámbos víktima pa hòspital pa tratamentu médiko.

Den e mardugá di djabièrnè 27 pa djasabra 28 di sèptèmber, alrededor di 3’or, polis uniformá a detené 4 hòmber. Ta trata di un hòmber di inisial R.H.G.A, di 19 aña di edat i un hòmber di inisial G.J.J.M., di 17 aña di edat, relashoná ku akto violensia públiko (openlijk geweldpleging), un hòmber di inisial C.J.S.J. di 32 aña di edat, relashoná ku insulto di un ámtenar den funshon i un hòmber di inisial I.M.B di 21 aña di edat, ku a trata di hui bai laga polis. Ta investigando e kasonan. Polis ta enfatisá ku no ta aseptá tipo di aktonan manera menshoná i lo aktua mesora kontra persona ku kometé e tipo di aktonan ariba menshoná.

Den oranan di mainta di djasabra 28 di sèptèmber a drenta keho di destrukshon di un outo. Entre 2’or di mardugá i 8’or di mainta, deskonosínan a manda un piedra den e glas di patras di e outo. E outo tabata stashoná dilanti di un kompleho di apartamentu situá na Kaya Nikiboko Sùit.

Riba djasabra 28 di sèptèmber a detené un hòmber di inisialnan J.R.A. di 48 aña, en konekshon ku violashon di e Lei di Opio BES, maltrato, akto kontra libertat personal i destrukshon.

Riba djadumingu 29 di sèptèmber, a drenta keho di ladronisia di un outo kolo shinishi di marka Toyota, modèl Vitz, numerá B-10791. Entre djasabra 28 di sèptèmber pa mas o ménos 11’or di anochi i djadumingu 29 di sèptèmber, pa mas o ménos 9.45’or di mainta deskonosínan a bai ku e outo ku tabata stashoná den kura di un kompleho di apartamentu situá na Kaya Wals. E yabi di outo tabata den e outo pero for di bista. Despues a bin detené un hòmber di inisial M.M.B. di 33 aña en konekshon ku ‘heling’ den kaso di ladronisia di e outo aki.

Riba djaluna 30 di sèptèmber a detené un dama di inisial Y.I.S. di 21 aña di edat den Centrumgebied en konekshon ku maltrato ku arma.

Den oranan di mainta di djaluna 30 di sèptèmber sentral di polis a risibí notifikashon ku deskonosínan a habri i kibra diferente outo ku tabata stashoná den Kaya Krisolito i Kaya Kuarts. Na Kaya Kuarts a bai ku un outo kolo blòu di marka Hyundai, modèl Accent, numerá B-2239. Ta investigando e kaso.

Share This
error: Content is protected !!