KRALENDIJK – 6 di òktober binidero ta bai organisá e aktividat grandi spesialmente pa hóben “Torneo di Reino”. Relashoná ku esaki gezaghèber di Boneiru Edison Rijna i Nimrod Pieters, General mènedjer di Jong Bonaire a papia ku prensa djabièrnè atardi.

Nan a elaborá riba diferente punto pa loke ta trata e aktividat. Gezagheber Edison Rijna a menshoná entre otro ku e aktividat di deporte no tin nada di aber ku Regata. Torneo di Rijna ta separá i ta konsentrá riba 3 diferente rango di deporte na tres sitio. Ta trata di un evento unda hopi hóben ta bai partisipá, gezaghèber a menshoná. Seguidamente a dirigí palabra i Nimrod Pieters, General mènedjer di Jong Bonaire. E na su turno a elaborá riba e 3 diferente wega ku ta bai tin. El a papia amplio i mustra pa medio di un pantaya e skema ku tin i mas informashon. Un kantidat grandi di hóben ta bai partisipá na e ‘Torneo di Reino 2019’. Ta bai tin aktividat di deporte den bario Rincon, Nort di Saliña i Tera Kòrá. Dia 6 òktober gruponan ta yega for di eksterior i ta keda den ‘Courtyard by Marriott Bonaire Dive Resort’.
Djaluna atardi ta tuma lugá apertura ofisial den stadion ‘Antonio Trenidat’. Tur kos ta sosodé den un siman. Saba i Sint Eustatius no ta partisipá i e idea ta pa 2020 organisá e torneo na isla riba, asina enbolbí esnan ku no a partisipá awor pa nan forma parti di e aktividat.
E idea ta pa partisipá i no saka e mihó for di e deporte. E hóben boneriano ta praktiká diferente deporte na mes momentu loke ta impreshonante,”Pieters a konta. 

Gezaghèber Rijna a finalisá e enkuentro ku prensa i a menshoná pa prensa kubri mas posibel di e aktividat, asina trese e hóbennan den publisidat i konsientisá nan pa kos bon. Entrada pa tur aktividat relashoná ku ‘Torneo di Reino’ ta grátis,”gezaghèber a menshoná.  E ‘Torneo di Reino’ ta entre 6 pa 11 di òktober 2019.  


Share This
error: Content is protected !!