KRALENDIJK – Mexico i USA (Merka) a bira e ganadónan maskulino i femenino di e promé torneo di Beach Volleyball Internashonal di Norceca organisá pa BoVoBo ku ta e bònt di vòlibòl di nos isla bou di presidensia di sra. Gisette Emer.

E partidonan final di e torneo tabata na nivel hopi haltu, tremendo partidonan i bala pena pa mira di un gran final.

Merka a bira ganadó di e torneo femenino, siguí pa Mexico di dos lugá i Guatemala di tres lugá.

Pa loke ta e kategoria maskulino, ta Mexico ku a bira ganadó, siguí pa USA di dos lugá i USA di tres lugá tambe.

Merka a partisipá ku dos tim.

E torneo ku a tuma lugá riba kanchanan di Delfins Beach Resort na Punt Vierkant, i a finalisá djasabra último den oranan di atardi pa despues sigui ku e seremonia di klousura i premiashon.

Pa gradisí i yama danki na e paisnan ku a partisipá, a hiba palabra e presidente di BoVoBo sra. Gisette Emer i di parti Delfins Beach Resort, sr. David Rietveld.

Nan ta satisfecho i kontentu kon e torneo a bai pa promé bia.

Ta spera di por haña oportunidat pa organisá esaki otro aña atrobe.

Despues di e parti ofisial a sigui e premiashon di e torneo unda a premia e promé tresnan den e kategorianan femenino i maskulino.

Riba potrètnan algun bista di e partido final maskulino i  premiashon djasabra último.

Share This
error: Content is protected !!