KRALENDIJK — Dionald Nicolaas konosí pa “Dio” huntu ku Cristina a konta kon nan a yega na e idea pa kuminsá ku nan propio negoshi. “Mi tabata traha pa un kompania di transportá hende, i tabata buska i trese hende ku regularidat na Kas di Kuido di Fundashon Maridal. E hendenan di edat avansá tabata bisami nan tin gana di dal un buèlta, esta hasi un paseo i wak kon bunita Boneiru ta. Mi no tabata por a kumpli ku nan deseo pa motibu ku e meta di e vehíkulo ku mi tabata manehá, no tabata duna e servisio di kore keiru,”nan a konta. “E pregunta kada bia di nobo tabata Sali for di boka di Winni Angila i Anna Silberie. Semper mi ta tende e mes un kos tur bia ku mi transportá nan di un sitio pa otro. Di e manera aki e idea pa kuminsá ku un kompania ku ta duna e tipo di servisio ku nan ta pidi a presentá. Nan a lanta un idea for di soño p’ami,”Dio i Cristina a konta. Dio a sigui bisa:”Nos ta transportá hende sea ku ta den ròl stul òf tin difikultat pa kana. Tur esaki na un preis rasonabel.

Kualke persona ku mester bai hasi kualke kos i no por kana òf tin ròl stul, por tuma kontakto ku nos na number di telefon 7850819 òf 7850820,” El a terminá bisando.

Share This
error: Content is protected !!