KRALENDIJK – Hype Events a tene un enkuentro ku prensa relashoná ku e di 52 edishon di Regata internashonal di nos isla. Djarason último tabatin e enkuentro ku a tuma lugá riba e boto ‘Aqua Adventures’ den kombinashon ku un “Happy hour”.

Tabata Hennyson Thielman di Hype Events ku a habri e enkuentro, pasando den e programa di Regata 52.

Regata 2019 ta kuminsá otro siman djarason 9 di òktober i finalisá djasabra 12 di òktober 2019.

Diputado di kultura sra. Nina den Heyer i Gezaghèber Edison Rijna lo hasi e apertura ofisial di regata, esaki riba e esenario prinsipal dilanti ofisina prinsipal di gobièrnu di Boneiru.

Tur loke ta regata ta tuma lugá den Playa, tantu kompetensianan komo tambe e festival di Regata anochi.

E karedanan riba laman ta ranka sali djaweps 10 di òktober, 9’or di mainta. Kas di Regata ta e sitio kaminda mayoria boto chikitu lo drenta awa i lo bin direkshon di Kralendijk. Manera tur aña tin e karedanan entre yate, optimist, sunfish, windsùrf i kitesùrf, Microboats, boto di piskadó i mas.

Inskripshon lo ta djarason 9 di òktober na Fòrt Oranje for di 12’or di mèrdia te ku 6’or di atardi.

Mas aleu, di akuerdo ku sr. Thielman, tin tres pa kuater boto di piskadó, tres sigur ta kla kaba pa bai laman pa e kompetensianan, e di kuater tambe ta den preparashon i ta spera ku e kategoria aki di botonan lo ta kuater den e kompetensianan di otro siman.

Djabièrnè ta e di 2 dia di kareda ku ta terminá ku un ‘happy hour’ di 5’or pa 7’or di anochi ku bon ambiente pa tur hende por gosa di dje kantu di laman. E di 3 dia ku ta e último dia di Regata, lo tin e ‘boat party’, den bahia di Kralendijk. Anochi lo tin e seremonia di entrega di premio riba e ensenario prinsipal di Regata den Playa.

Hype Events ta hasiendo hopi esfuerso pa stimulá partisipantenan lokal i internashonal pa engrandesé nos Regata. Kant’i awa riba malekon durante dia di djaweps i djabièrnè tin entre otro lès di traha microboats i lès di windsùrf. E lèsnan aki ta gratis pa un i tur. Ku esaki Hype Events kier stimulá i lanta e interes prinispalmente bòu di hóben nan. Djabièrnè ta bai tin shou di windsùrf i seadoo. Tambe tin un aria pa mucha (Kids Corner) na unda tur mucha por disfrutá di diferente wega entre otro di weganan di awa.

Sr. Thielman a hasi menshon di e diferente spònsernan, tambe Gobièrnu di Boneiru ku ta karga nos regata.

Esnan ku tambe a hiba palabra ta sr. Papito Thomas na nòmber di Gobièrnu di Boneiru, sra. Claris St. Jago-Trinidat di Selibon N.V. i sr. Rodger Albertus di Obersi Group.

Tur ku a hiba palabra a mustra satisfakshon i ta orguyoso di por ta parti di Regata i lo sigui apoyá i sostené e regata.

E parada di tur nashon lo ta riba djarason 9 di òktober. Esaki ta sali for di Stadion di Playa pa 6’or di atardi i tèrminá pegá ku e esenario prinsipal di regata dilanti ofisina prinsipal di gobièrnu di Boneiru. Tambe lo bai tin e famoso Parada di mucha. Tin un total di 42 stènt di kuminda i artesania ku a inskribí te na e momentonan aki.

Riba potrètnan, bista di e paseo riba boto den bahia di Kralendijk, unda ku Hype Events a tene su enkuentro ku prensa den kompania di algun spònser.

Share This
error: Content is protected !!