KRALENDIJK – 15 di Novèmber 2018 a lanta ‘Dialogo Sentral’ (DS) ku e meta pa fortifiká i drecha e parti sosial di e hende riba Boneiru. Awe e gruponan ku ta forma parti di e Diálogo Sentral huntu ku sekretario di estado Tamara van Ark a firma algun punto ku nan ta bai atendé. Awe traimèrdia e grupo a papia ku prensa i a informá relashoná riba loke nan a firma i tin tur atenshon pe. Promé persona kende a dirigí palabra tabata gezaghèber

Edison Rijna, presidente di ‘Dialogo Sentral’ a menshoná  ku ta un plaser pa partisipá na e reunion asina importante. “Nos di DS a presentá e prekupashonnan i ta un sorpresa pa nos ku sekretario di estado Tamara van Ark a reakshoná i ta presente rápidamente. Pues el a demostrá seriedat pa nos puntonan. Nos a papia i a firma algun punto importante pa atendé.  Loke nos a firma ta pa atendé i mehorá kosnan ku ta na bienestar di e pueblo. Nos ta kontinuá huntu ku esnan na Denhaag loke ta bai mehorá nos nivel di bida na Boneiru,”presidente di DS a menshoná.  

Seguidamente a papia vise presidente Jan-Willem van den Braak kende tambe a ekspresá e positivismo di loke nan a deliberá awe. “Mi ta kontentu ku sekretario di estado van ark ta presente. Esaki ta e di 4 reunion i hopi a sosodé durante e periodo ku nos a papia, algu mas ku un aña. Hopi kos a keda atendé. Hopi rápido van Ark a bai di akuerdo pa sinta ku nos. Mi ta super kontentu, Boneiru i Hulanda ta bai traha sistemátikamente na bienestar di Boneiru. Ta bin kambio positivo na bienestar di nos hendenan. Nos ta bai sinta pa e parti di ‘akuerdo sosial’, i si tur kos kana bon, pa luna di desèmber nos ta logra pa inisiá pasonan grandi,”van den Braak a menshoná.

Sekretario di estado Tamara van Ark a papia i a bisa ku ta un plaser pa mi ta na Boneiru pa e okashon. Nos a pasa riba diferente punto entre otro pobresa. Nos a sinta ku hendenan di Sosiale zaken, Vakbond,  BC i otronan, pa yega na kosnan konkreto i stabil na benefisio di e hende, Sigur e parti di mínimo sosial. Kos ta bai bira mihó i e hende ta bai sinti i mira e kambio. Huntu sigur nos por logra mas i ta loke nos ta bai pe. E parti di krèsh tambe ta bai haña atenshon pa mehorashon riba e isla,”sekretario di estado van Ark a menshoná.  

Despues a dirigí palabra Mavis Abrahams na nòmber di USIBO. “Dos dia hopi fruktífero unda nos a sinta i papia riba diferente tópiko. Awe un reunion importante i e lucha ta pa nos yega na kosnan ta pa un mihó bida na Boneiru. Entre otro pobresa di esnan ku no ta traha i esnan ku ta traha ku i no ta stabil. E parti di instansianan ku no ta duna krédito sigur ta afektá e hende mas, i huntu nos a deliberá pa yega solushon pa mehorashon. Van Ark ta pone preshon pa Hulanda yuda loke ta di apresiá. Nos ta bai yega kaminda nos ke bai pa un mihó pueblo. Hopi hende no ta sobrebibí gastunan manera awe elektrisidat i pago di kas,entre otro Abrahams a menshoná.

Eddy Carrillo na nòmber di BBE a papia i a menshoná  ku ‘Diálogo sentral’ tin motibu pa eksistí. “Despues di 11 luna nos a yega na un akuerdo i ta algu grandi pa Boneiru. Nos a laga tur loke a sosodé den pasado i kuminsá di nobo, di awor pa dilanti,”Carrillo a menshoná. Último persona ku a dirigí palabra e atardi tabata diputado Nina den Heyer, na nòmber di OLB.

“Nos ta kontentu e union ta bon pa mehorá kosnan pa e pueblo. Sekretario di estado van Ark a mira e nesesidat di e pueblo di Boneiru. Awe nos a dal un paso grandi dilanti, ku ta indiká den bon direkshon. Nos tur a sinta separá i trese e mes un puntonan, i ami ta sigur ku pronto nos ta bai logra hopi,”diputado Nina den Heyer a menshoná.  

Share This
error: Content is protected !!