KRALENDIJK – Djaweps 26 di sèptèmber 2019 a tuma lugá klòusura di Kurso di Embaraso kual a kuminsá dia 22 ougùstùs. Un total di 10 mama i 5 tata a partisipá na e kurso. E kurso tin un durashon di 6 siman, dos bes pa siman. E kurso ta konsistí di dos parti. Un parti teóriko na forma interaktivo kaminda mayornan ta partisipá aktivamente ku pregunta i remarke tokante e diferente tópikonan tratá. Tópiko manera desaroyo di embaraso, parto, lechi di pechu i lechi di bòter, e ròl di “consultatiebureau” despues di parto, kuido di yu na kas despues di parto (kraamzorg) i inskripshon di beibi na registro sivil i tur lokual ta relashoná ku esaki. E di dos parti ta trata ehersisio speshal pa e hende muhé embarasá.

E kurso ta enserá tambe un anochi speshal pa tatanan bou di guia di Sharlon Willems. Durante e seshon akí un kursista maskulino ku a kaba di bira tata ta kompartí su eksperensia ku e futuro tatanan. Tambe tatanan ta risibí informashon i tep kon aserká, atendé i manehá e eksperensia mará na nan ròl komo tata.

E aña akí, e último anochi un kursista femenino ku a kaba di bira mama tambe a kompartí ku mayornan su eksperensia promé, durante i despues di parto. Tantu relashoná ku e parto komo ku e relashon entre mayor i yu.

Na final di e kurso tur kursista a risibí nan sertifikado di partisipashon.

Sentro hubentut i famia ta gradisí e fasilitadonan, señoranan Anita Groenendal, Tamara Martie, Jeamaliria Emerenciana, Hendrika van den Ouden, Rachel Casimiri, Gisella Clementina, Roos Breaken, Jennifer Pocornie i mener Sharlon Willems.

Por último sentro hubentut i famia ta deseá ku su kursistanan i tambe tur otro (futuro) mayornan por ehersé nan ròl di mama òf tata ku hopi sabiduria, amor i den reflekshon kontinuo. Pa kualke informashon tokante Kurso di Embaraso òf kualke otro pregunta relashoná ku sosten na famia por pasa serka nos na Kaya Prinses marie # 7 òf bèl 715 7200.

Share This
error: Content is protected !!